Drejtori i AKI raporton para Komisionit parlamentar për gylenistët e dëbuar
Drejtori i ri i AKI-së, Shpend Maxhuni ka raportuar për herë të parë pas marrjes së këtij posti, para komisionit për mbikëqyrjen e AKI-së. Përveç sigurisë dhe Veriut të Kosovës, mësohet se temë e diskutimit ishte edhe dëbimi i qytetarëve turq nga Kosova, kohë kur Maxhuni ishte Drejtor i Policisë së Kosovës.
Pas takimit Zv/kryetarja e këtij komisioni, Ganimete Musliu nuk pranoi të flas rreth raportimit të drejtorit të AKI-së para komisionit, lidhur me dëbimin e shtetasve turq por shtoi se tashmë është themeluar një komision parlamentar hetimor për këtë çështje.
“Nuk mund të themi asgjë për opinionin e gjerë dhe publikun. Të gjithë epilogun përfundimtar do ta thotë komisioni parlamentar i cili ka marrë aprovimin në seancës parlamentare për të hulumtuar këtë rast në detaje”, tha ajo.
Duke e komentuar emërimin e Maxhunit në krye të AKI-së, pasi që ai gjatë dëbimit të turqve nga Kosova ishte në krye të policisë, Musliu tha se emërimi i tij nuk është i jashtëligjshëm, pasi që në lidhje me rastin në fjalë, nuk është kërkuar shkarkimi i tij nga posti i të parit të policisë.
“Nuk e shoh ndonjë shkelje të ligjit ose ndonjë shkelje të ndonjë rregullore, pse ai është zgjedhur drejtor. Ne i kemi bërë pyetje direkt dhe me zgjedhjen e tij, qoftë për verifikimin ose për gjëra të tjera dhe thjeshtë kemi marrë përgjigjej shumë konkrete dhe shumë të nevojshme nga vet drejtori i AKI-së,” tha Musliu duke shtuar se pasi u spekulua për këtë çështje ishte pikërisht ky komision që ka kërkuar të dij se a e ka kry verifikimin z. Maxhuni.
“Por duke pasur parasysh që ai ka kohë të gjatë ose përvojë të gjatë në institucionet e sigurisë, u deklarua para komisionit, që ndoshta është mirë dhe për media dhe për qytetarët që ta kuptojnë njëherë e përgjithmonë që ai 18 herë ka kaluar nëpër verifikime dhe të gjitha procedurat i ka kaluar me sukses, kështu që edhe neve na mbetet vetëm që të bashkëpunojmë në të ardhmen dhe të mos ndalemi në gjëra të cilat e pengojnë punën dhe zhvillimin e AKI-së,” tha ajo.
Në fund, Zv/kryetarja e komisionit për mbikëqyrjen e AKI-së, Ganimete Musliu tha se komisioni ka kërkuar nga Drejtori i AKI-së, që të kenë një bashkëpunim më të mirë në të ardhmen, pasi që nuk kanë qenë të kënaqur me bashkëpunimin e deritanishëm me këtë institucion.
