Drejtori i Bashkisë humb betejën me COVID-19, Veliaj: U prehsh në paqe Feti!

Drejtori i Projekteve Publike pranë Bashkisë Tiranë, Feti Fanaj, humb betejën me COVID-19. Duke shprehur ngushëllime familjes, për të palodhurin Feti, Kryetari i Bashkisë Tiranë, Erion Veliaj, përmes rrjetit social Facebook shprehet:

“Fetiu ishte një mik ideal, një baba i jashtëzakonshëm i Mishelit të vogël. Nga ata njerëz punëtorë që i dha kaq shumë Tiranës, kuronte çdo ditë, me po të njëjtin pasion, çdo detaj të shkollave, kopshteve dhe çerdheve tona publike.

I kudogjendur, i palodhur!

U prehsh në paqe i dashur Feti, vëlla i pazëvendësueshëm për të gjithë ne!

Ngushëllime Nidës së re e nënës së tij hallemadhe, që sapo humbi edhe të shoqin. Nuk do t’ju lëmë kurrë vetëm!”

Ndryshe, 40-vjeçari Feti Fanaj ishte dërguar për mjekim më të specializuar në Turqi, por fatkeqësisht nuk mundi t’i mbijetonte. Më herët ai kishte humbur dhe babain e tij nga po nga COVID-19.