Drejtori i Inteligjencës amerikane: Kina, kërcënimi më i madh që nga Lufta e Dytë Botërore

Drejtori i Inteligjencës amerikane tha se Kina paraqet kërcënimin më të madh për demokracinë dhe lirinë në të gjithë botën, që nga Lufta e Dytë Botërore.

“Inteligjenca është e qartë: Pekini synon të dominojë SHBA-në dhe pjesën tjetër të planetit ekonomikisht, ushtarakisht dhe në teknologji”, tha Drejtori për Inteligjencë Kombëtare i SHBA-së, John Ratcliffe, në një opinion për Wall Street Journal.

Ratcliffe, një ish-kongresist republikan i emëruar nga Trump në krye të spiunazhit të SHBA në pranverë, tha se Kina përbën kërcënimin më të madh për Amerikën sot dhe kërcënimin më të madh për demokracinë dhe lirinë në të gjithë botën.

Strategjia e Kinës, tha Ratcliffe, ishte që njësitë kineze të vidhnin pronën intelektuale të kompanive amerikane, ta kopjonin atë dhe më pas të zëvendësonin kompanitë amerikane në tregun global.

Një zëdhënës i Ambasadës kineze hodhi poshtë komentet e Ratcliffe si deformuese të fakteve dhe hipokrite, duke shtuar se ato treguan mendësinë e ngulitur të Luftës së Ftohtë dhe paragjykimet ideologjike të disa njerëzve në SHBA.