Drita dhe hijet e 9 nëntorit

Presidenti i Gjermanisë, Frank-Walter Steinmeier ka kërkuar në përvjetorin e revolucionit të nëntorit të vitit 1918 dhe natës së pogromit hebrenj “një patriotizëm demokratik” në Gjermani – një “patriotizëm me tone të ulëta”. Katastrofat e dy luftërave botërore dhe Holokausti janë pjesë e pandashme e identitetit gjerman, tha presidenti Steinmeier, në seancën përkujtimore të ngjarjeve të kësaj dite në Bundestag.

Njëkohësisht duhet kujtuar rrënjët e demokracisë në Gjermani, të cilat i gjejmë në vitin 1918. “Ne mund të jemi krenarë me traditën e lirisë dhe demokracisë në Gjermani, pa pasur nevojë të menjanojmë shikimin”, tha presidenti. “Por patriotizmi demokratik nuk është një jastek për pushim – ai është një vend prej nga duhet të veprohet.”

Historia dhe problemet

9 nëntori i vitit 1918, kur Philipp Scheidemann nga balkoni i Reihtagut gjerman shpalli republikën, nuk e ka gjetur kurrë në historinë gjermane vendin që e meriton, tha Steinmeier. “Ai konsiderohet një fëmijë i njerkës në historinë e demokracisë”. Nga kjo datë fillon zanafilla e të drejtave të femrave që të votojnë. Por këtu gjejmë edhe “bazat e një shteti modern social”.

Njëkohësisht kjo datë mbetet edhe çështja më e dhimbshme e historisë gjermane, sepse vetëm dy dekada më vonë Gjermania ka bërë përpjekje të shkatërrojë vendet dhe popujt tjerë. “Familjet hebreje, prindërit me fëmijët e tyre, janë dërguar në dhomat e gazit”, tha Steinmeier.

Përgjigjen nuk mund ta jepim vetëm me fjalë, por edhe me vepra. Përkujtimet nuk duhet të jenë vetëm ritual. “Në veprimet tona duhet të dëshmojmë se gjermanët vërtetë kanë mësuar nga e kaluara.”

Gjermania i mbetet besnike përgjegjësisë së saj – një përgjegjësi që nuk njeh kufi. Kjo nënkupton edhe vazhdimin e luftës së denjë kundër antisemitizmit dhe respektimin e njerëzve, pavarësisht përkatësisë së tyre fetare apo ngjyrës së lëkurës.

“Parlament nuk është një gjë e vetkuptueshme”

Nga e kaluara historike rrjedhë edhe detyra e mbrojtjes së demokracisë sot. “Ky Parlament nuk është diçka e vetkutpueshme”, paralajmëroi Steinmeier. “Është një arritje historike”, të cilën duhet ta mbrojmë “në radhë të parë në shtëpinë tonë”. Ai që sot sërish mbështetë nacionalizmin “nuk ka të drejtë në flamurin zi-kuq-ngjyrë ari”, thotë presidenti, i cili u shoqërua me një duartrokitje të gjatë.

Demokracia nuk ka dështuar historikisht – përkundër barbarizmit dhe nacionalizmit. “Hisotirkisht kanë dështuar vetëm armiqtë e demokracisë”. Republika ka fituar në histori. Presidenti ruikujtoi këtu rënien e murit të Berlinit, në vitin 1989 – “9 nëntorin më të lumtur në historinë tonë”.

“Barbarizmi”

“9 nëntori është një ditë historike për gjermanët”, theksoi kryetari i Bundestagut Wolfgang Schäuble në fillim të seancës. Në këtë datë shënohen “dështimet dhe sukseset” gjermane. Ka dështuar revolucioni i vitit 1848. Me 9 nëntor është vrarë deputeti Robert Blum në Vjenë, nga trupat kundërrevolucionare. Në vitin 1989 është kurorëzuar me sukses një revolucion tjetër paqësor i gjermanëve, i cili ka rezultuar me rënien e Murit të Berlinit.

Por 9 nëntori shënon edhe barbarizmat më të mëdhenj kundër civilizimit, tha Schäuble. Dhe kjo ka të bëjë jo vetëm me natën e pogromit në vitin 1938, por edhe me sulmet aktuale kundër hebrenjve në Gjermani. “Nuk duhet të rrezikojmë kurrë paqën dhe lirinë – kurrë.” Ky është një paralajmërim shumë serioz i 9 nëntorit, tha Schäuble./DW/