Driton Bilalli nga Vushtrria, zgjidhet kryetar i komunës Tranemo në Suedi

Një komunë me rreth 12 mijë banorë në Suedi, tashmë për kryetar ka një shqiptar. Ky është Driton Bilalli, me prejardhje nga Vushtrria i cili do ta drejtoj Komunën Tranemo e cila ndodhet 120 km në lindje të Gotheburgut, qytetit të dytë më të madh suedez.

Nga 1 qershori, dhe në katër vitet e ardhshme, banorët e saj do të drejtohen nga Bilalli, që është pjesë e Partisë Socialdemokrate.

Driton Bilalli llogaritet si shqiptari i parë që fiton post zyrtare i cili buron nga zgjedhjet në këtë shtet. Në rrjetin profesional Linkedin, të plotësuar një ditë më parë, Bilalli thekson se ditën parë të punës e filloi me një buzëqeshje të madhe.

“Sot me 1 qershor, mora detyrën e kryetarit në Tranemo. Këtë detyrë nderi do ta mbroj dhe do ta kryej me shumë respekt, për banorët dhe të ardhmen e bashkisë,” thekson Driton Bilalli. Ai rrëfen se është një banor krenar i Tranemos, që nga viti 1994 kur aty u vendos nga Kosova.

“Ky ishte viti kur unë dhe familja ime u vendosëm në komunën e Tranemos, pasi u larguam nga lufta në vendin tonë të lindjes, në Kosovë,” shkruan Bilalli duke rrëfyer biografinë e tij ndërsa shton:

“Unë atëherë isha 10 vjeç. Është e pamundur të përshkruhet me fjalë mirëpritja që na bëri bashkia dhe e gjitha është falë mbështetjes nga të gjithë banorët/bashkia, që më bën të jem ky që jam, e ku qëndroj sot.”

Bilalli deklaroi se një nga arsyet më të forta përse vendosi të marrë këtë detyrë është mundësia për t’ia kthyer kësaj komune kontributin, për aq shumë sa ajo i ka dhënë atij.

“Shpresoj se së bashku mund të kontribuojmë në një zhvillim të vazhdueshëm pozitiv për komunën e Tranemos.”

Bilalli deklaron se pret të dialogojë me të gjitha forumet dhe aktivitetet, që të kontribuojnë që së bashku të arrijnë ta bëjnë Tranemon një komunë të qëndrueshme dhe tërheqëse

“Faleminderit të gjithëve që më keni uruar dhe jeni të lumtur që më shihni në këtë pozicion, më ngroh gjithë zemrën”.

Ndryshe, Komuna Tranemo ndodhet në qendër të Suedisë. Kryetari i Komunës në këtë shtet, zgjidhet me shumicë votash të këshilltarëve komunal, pra, të partive që kanë shumicën./RTK/