Drogë përmes lumit Buna, kapen 205 kg marijuanë

Policia kufitare në Ulqin ka kapur rreth 205 kilogram marijuanë në momentin kur po futej përmes lumit Buna nga Shqipëria në Mal të Zi ndërkohë trafikantët ende nuk janë arrestuar.

“Rreth orës 4:00, në vendin e quajtur Sutjel afër Ulqinit, policia ka gjetur shtatë çanta plotë me lëndë narkotike që dyshohet se është marijuanë. Çantat janë gjetur rreth 130 metra nga bregu i lumit Bojana ndërsa këqyrja e vendit është bërë nga Policia e Ulqinit,” thekson Drejtoria e Policisë së Malit të Zi duke saktësuar se janë kapur gjithsejtë 204.8 kilogram substancë narkotike që dyshohet se është marijuanë.

“Policia po ndërmerr aktivitet intensiv në identifikimin e personave që kanë trafikuar drogën përmes lumit Bojana në Mal të Zi. Policia kufitare ka kontaktuar kolegët e policisë kufitare të Shqipërisë për të ndërmarrë masa që janë në kompetencën e tyre,” thekson Drejtoria e Policisë së Malit të Zi përmes një komunikate.