Dronë të dyshuar nga Serbia në veri, Drejtori i Policisë: Po monitorojmë me KFOR-in

Drejtori i Përgjithshëm i Policisë së Kosovës, Gazmend Hoxha, tha sot se hapësira ajrore e Kosovës është shkelur nga dronë që dyshojnë se janë futur nga Serbia, dhe po monitorohet situata me KFOR-in.

“Kohën e fundit kemi pasur fluturime të dronëve që ne po dyshojmë që po vijnë nga territori i Serbisë në pjesën veriore të Kosovës. Policia është në kontakt me KFOR, jemi duke bërë monitorimin dhe me pa se çfarë mund të bëhet”, tha Drejtori i Përgjithshëm, Gazmend Hoxha, në ceremoninë e shkatërrimit të dhjetëra armëve të lehta të organizuar nga Policia e Kosovës ndërsa saktësoi se rreziku ekziston për pjesën e kufirit, por jo për qytetarët, të cilët i siguroi se janë të mbrojtur nga institucionet.

Shkelja e hapësirës ajrore të Kosovës nga dronë të Serbisë, është konfirmuar ditë më parë edhe nga ministri në detyrë i Brendshëm, Xhelal Sveçla.

Ndryshe, hapësira e ulët ajrore e Kosovës menaxhohet nga Autoriteti i Aviacionit Civil të Kosovës, por hapësira e lartë, ajo mbi 6.200 metra, është nën kontrollin e Hungarisë, përkatësisht të HungaroControlit, meqë Kosova nuk ka arritur ende kapacitete për të menaxhuar hapësirën e lartë ajrore.

Bazuar në Rezolutën 1244 të Këshillit të Sigurimit të Kombeve të Bashkuara nga viti 1999, Komandanti i misionit të NATO-s në Kosovë, KFOR, është përgjegjës për sigurinë e hapësirës ajrore të Kosovës.