Dubai-Emar-Rama, Berisha: Aferë mafioze e Edi Ramës me Portin e Durrësit!

Kryetari i Partisë Demokratike, Sali Berisha, sot ka denoncuar aferën mafioze, korruptive të Kryeministrit Edi Rama me portin kryesor, shekullor e mijëvjeçar, Portin e Durrësit ku një kompanie i janë dhënë 1.5 mln metra katrorë për ndërtimin e Dubai-Emar-Rama.

“Ligji i parë i çdo hajduti është se ai kërkon të vjedhë sa më shumë. Rasti më tipik është Edi Rama, i cili pasi është kapur në flagrancë me vjedhjen e 420 mln euro për djegësat, gjithçka me firmën e tij, vrapon të vendosë harresë këtë vjedhje, me dy megaafera të mëdha, që janë 10 fishi i kësaj shume; Ajo e Butrinti dhe Portit të Durrësit.

Jam këtu për të denoncuar për të shumtën herë, aferën mafioze, korruptive të Ramës me portin më kryesor, shekullor e mijëvjeçar, portin e Durrësit. Kjo aferë vjen në dhunim me të gjitha ligjet e vendit. Rama deklaron se i ka dhënë një kompanie territorin prej 1.5 mln metra katrorë të ndërtimit aty të Dubai-city, të Dubait-Emar-Rama, ose Rama-Emar. Dhënia pa garë është dhunim i ligjeve të vendit, por edhe atyre ndërkombëtare që Shqipëria është e detyruar t’i respektojë,” tha Sali Berisha duke shtuar se Rama u la shqiptarëve veç 10% të fitimit ndërsa për vete merr 90%.

“Ky megaskandal është e tillë, që askush nuk njeh kompaninë, pasi kompania është offshore dhe kjo ështe e ndaluar me ligjet e vendit, që kompani të tilla të marrin prona të tilla të shqiptarëve. Kjo bëhet që Rama dhe bashkëvjedhësit e tij, duan të fshehin fitimet e tyre përrallore nga kjo aferë, në parajsat fiskale të mafias botërore. Në këtë aferë Edi Rama u thotë shqiptarëve se Shqipëria fiton 300 mln, ndërkohë që vetëm trualli kushton jo më pak se 3 miliardë euro, me çmimin aktual. Pra nëse pronarët e trojeve në Shqipëri e japin truallin për zhvillim ndërtuesve, sipas zonave me një % nga 20 deri ne 50%, Edi Rama u len shqiptarëve vetëm 10% të fitimit. Kurse merr vetë me kompaninë e Emarit-Rama, 90% të vlerës,” shprehet Berisha duke e cilësuar si një superskandal që tejkalon çdo lloj imagjinate.

Duke i bërë thirrje Edi Ramës dhe aksionerëve të fshehtë të Portit të Durrësit që të heqin dorë, Kryetari i PD, i bëri të qartë se nuk do ta gëzojnë pasurinë e shqiptarëve.

“A është vetëm kjo gjoba që shqiptarëve u bën Edi Rama me këtë aferë. Kaq e tmerrshme dhe e rëndë është gjoba që Rama u bën, duke i privuar ata nga porti shekullor. Për fitimet e tij marramendëse, ai ka shpallur se do të ndërtojë një port të ri, i cili shkon afërsisht 2 miliardë euro. Pra shqiptarët duhet të paguajnë me taksat e tyre ndërtimin e një porti të ri në Porto Romano, në mënyrë që Rama me kompanitë offshore të përvetësojë 1.5 mln metër katror porti. Vetëkuptohet 90% të sipërfaqes së ndërtimit, në mos e më shumë, i merr për vete.

Më këtë rast dua ti them Ramës, aksionerëve të fshehtë të kësaj kompanie, përfituesve fundorë, se ju që veproni kështu me një mafioz, jeni kryemafiozë dhe se kurrë nuk do të gëzoni pasurin publike të shqiptarëve në Portin e Durrësit. Hiqni dorë nga kjo aferë superskandal,” tha Kryetari i PD, Sali Berisha, duke i bërë të qartë se Porti i Durrësit është Port i NATO-s dhe BE-së dhe nuk mund të ndryshojë destinacion ndërsa përfundoi:

“Porti i Durrësit është port i një vendi të NATO-s dhe BE-së, porti i një rëndësie strategjike. Ndryshimet e destinacionit të të cilit nuk mund të bëhen pa një miratim të NATO-s dhe BE-së. Por Rama nuk njeh normë, kufi. Ai tani ëndërron veten multimiliarder dhe gjithçka bazuar në vjedhjen e pasurive publike të shqiptarëve.”