Duhet të zbatohen, Kurti: S’ka prioritet mes Marrëveshjeve!

Kryeministri i Kosovës, Albin Kurti, ka sqaruar sot delaratën e të dërguarit të posaçëm të BE-së për dialogun Kosovë-Serbi, Mirosllav Lajçak, pas takimit të mbrëmshëm se janë pajtuar me Prishtinën për zbatimin e të gjitha marrëveshjeve të Brukselit, duke saktësuar se ndërmjet marrëveshjeve me Serbinë nuk ka hierarki, prandaj ato duhet të zbatohen në tërësi.

“Janë 33 marrëveshje të Brukselit nga dekada e kaluar dhe nuk ka asnjë marrëveshje e cila ka prioritet nga një marrëveshje tjetër, pra nuk ekziston hierarkia e atyre marrëveshjeve. Ato janë të vendosura në rrafshin horizontal,” tha Kurti ndërsa duke ju përgjigjur interesit të madh të gazetarëve nëse do të zbatohet edhe Marrëveshja për Asociacionin e Komunave me shumicë serbe, shtoi se ashtu siç është nënshkruar më 19 prill 2013, e më pas edhe i elaboruar në shtatë kapituj më 2015, ajo është e vetmja nga 33 marrëveshjet e Brukselit, që nuk e ka kaluar testin e Gjykatës Kushtetuese”.

Në fund, ai foli dhe për angazhimin e fundit të diplomatëve amerikanë e evropian për arritje e një marrëveshjen finale me Serbinë.

“Diplomacia fluturuese i është bashkangjitur takimeve të nivelit të lartë për propozimin e Bashkimit Evropian të mbështetur nga Franca, Gjermania dhe SHBA. Ky propozim i ka pesë fjali në preambulë dhe 10 nene. Kur e patëm marrë ne atë me datën 9 shtator, patëm thënë se është bazë e mirë për diskutime të mëpastajshme. Është një kornizë e platformë e cila na mundëson të ecim përpara, por nevojitet një proces negociator në mënyrë që ai propozim të bëhet marrëveshje,” tha Kryeministri i Kosovës, Albin Kurti, pas konferencës ndërkombëtare për Siguri Kibernetike “Cyber ZERO” duke përfunduar:

“Këto 10 nene nuk tolerojnë një nen nga fundi të sillet i pari si parakusht.”