Duke kërkuar shqiponjën, Presidenti Meta sërish del bllof!

Pasi e lëshoi nga duart shqiponjën e 2 Marsit, dhe në përpjekje për t’iu kthyer tregut politik me patriotizëm dje i dërgoi Letër institucioneve të pavarura dhe atyre në vartësi të Kryeministrit, sot gardiani i vetëliruar i Kushtetutës, Presidenti i Republikës, Ilir Meta sërish del bllof. Sot, duke konfirmuar se ende nuk e ka lexuar Kushtetutën, pas terrorit qeveritar ndaj fasonëve për disa ditë me radhë, kur numri i të infektuarëve sa shkon e rritet, me rastin e Ditës Ndërkombëtare të Sigurisë dhe Shëndetit në Punë, deklaron se ishte edhe i shqetësuar për fasonët:

“Me shqetësim kam ndjekur këto ditë edhe situatën në sektorin fason, ku janë shfaqur një sërë problematikash, që mund të ishin shmangur nëse masat kufizuese, higjena dhe distancimi social në ambientet e punës do të ishin respektuar. Ndërkohë që ky sektor kryesor punëdhënës ka nevojë për një përkrahje më konkrete për të mbijetuar,” thotë Ilir Meta sot kur e gjithë Kruja ka kohë që është e terrorizuar kontrollet qeveritare, koronavirusi dhe në veçanti Edi Rama dhe jo vetëm më 28 Prill.

Por bllofi i Ilir Metës zbulohet sepse ai që i ka treguar Presidentit se sot është Dita Botërore e Sigurisë dhe Shëndetit në Punë nuk e ka sqaruar se 28 prilli është gjithashtu një ditë, në të cilën sindikatat në botë përkujtojnë dhe nderojnë kujtimin e viktimave të aksidenteve dhe sëmundjeve në punë, gjë e cila mungon tek reagimi i Metës në rrjetin social Facebook, në këto ditë të vështira që po kalon ish-gardiani i Kushtetutës pas dekretimit të ndryshimeve kriminale në Kodin Penal.

Sikur vërtetë të ishte shqetësuar Presidenti Meta dhe të ishte zgjuar me kujtimin për Ditën Ndërkombëtare të Sigurisë dhe Shëndetit në Punë do ti zinte në gojë edhe sindikatat që heshtin si dhe viktimat e aksidenteve në punë, në veçanti ato të ndërtimit.

Apo heshtjen e ka blerë Edi Rama edhe për këtë fushë biznesi që kontrollohet nga ushtarët e tij, e që opozita nga mosdija i anatemon edhe si oligarkë. Oligarkë, dhe pa tru, vetëm në Shqipëri mund të quhesh! Pse jo, kur President mund të jetë edhe Ilir Meta!

Ja statusi plotë:

Me rastin e Ditës Ndërkombëtare të Sigurisë dhe Shëndetit në Punë, përsëris thirrjen drejtuar Qeverisë për të garantuar me përgjegjësi dhe transparencë të gjitha masat mbrojtëse për mjekët, infermierët dhe personelin e tyre mbështetës, të cilët rrezikojnë shëndetin e tyre për të mbrojtur shëndetin e të gjithëve ne.

Me shqetësim kam ndjekur këto ditë edhe situatën në sektorin fason, ku janë shfaqur një sërë problematikash, që mund të ishin shmangur nëse masat kufizuese, higjena dhe distancimi social në ambientet e punës do të ishin respektuar.

Ndërkohë që ky sektor kryesor punëdhënës ka nevojë për një përkrahje më konkrete për të mbijetuar.Garantimi i kushteve të sigurta dhe të shëndetshme të punës në çdo sektor, veçanërisht të kujtdo që është në vijën e parë kundër COVID-19, janë të domosdoshme për menaxhimin e pandemisë dhe rikthimin sa më shpejt në normalitet.

Jeta, shëndeti dhe mirëqenia e qytetarëve janë të parat!