Duke u larguar nga Parisi, Rubio: Nëse nuk mund ti jepet fund luftës në Ukrainë, Ne vazhdojmë tutje!

Sekretari amerikan i Shtetit, Marco Rubio, tha mëngjesin e sotëm se nëse nuk është e mundur të përfundojë lufta në Ukrainë, Shtetet e Bashkuara duhet të braktisin përpjekjet e tyre dhe të ecin përpara.

“Nëse nuk është e mundur të ndalet lufta në Ukrainë, ne duhet të ecim përpara,” tha Marco Rubio për media para se të nisej nga Parisi ku zhvilloi takim me partnerët e tij evropianë.

“Kjo nuk është lufta jonë. Ne nuk e filluam. Shtetet e Bashkuara e kanë ndihmuar Ukrainën për tre vjet dhe ne duam që lufta të mbarojë, por kjo nuk është lufta jonë,” tha Rubio duke shtuar:

“Presidenti Donald Trump ka bërë përpjekje të vazhdueshme në nivelin më të lartë të qeverisë për 87 ditë për ta përfunduar këtë luftë. Tani po arrijmë në një pikë ku duhet të vendosim dhe të përcaktojmë nëse kjo është e mundur. Kjo është arsyeja pse po flasim me të dyja palët.”

Shefi i diplomacisë amerikane ishte i qartë pas këtyre përpjekjeje serioze të Presidentit Trump:

“Ne duhet të përcaktojmë shumë shpejt, brenda pak ditësh, nëse një marrëveshje paqeje është e realizueshme në një afat të shkurtër, sepse nëse nuk është, mendoj se thjesht do të ecim përpara,” tha Sekretari amerikan i Shtetit mëngjesin e sotëm shumë i prerë:

“Ne nuk do t’i vazhdojmë këto përpjekje për javë dhe muaj pa fund!”

Në fund, Sekretari amerikan i Shtetit, Marco Rubio, tha se Donald Trump ende dëshiron të punojë drejt arritjes së paqes, por se Shtetet e Bashkuara kanë edhe shumë prioritete të tjera në të gjithë botën. “Duhet të vendosim shumë shpejt dhe po flas për çështjen e ditës, nëse është e mundur të arrihet një marrëveshje në javët e ardhshme. Nëse është e mundur, ne jemi dakord. Nëse jo, do të duhet të përqendrohemi në prioritetet tjera!”

Ndryshe, Presidenti i Shteteve të Bashkuara, Donald Trump, tha dje se beson që një armëpushim është “afër” dhe se Moska duhet t’i përgjigjet së shpejti propozimit të fundit amerikan.