Durrës, Basha: Ende nuk ka vaksinë për koronavirusin, por ka për Ramavirusin!
Pas dy muajve të mbyllur për shkak të koronavirusit të gjithë shqiptarët e kanë kuptuar se rreziku më i madh për shëndetin dhe ekonominë e tyre është Ramavirusi, shprehet Kryetari i Partisë Demokratike, Lulzim Basha pas takimit me banorët në zonën e Kënetës në Durrës, duke konstatuar rrënimin e tyre nga pandemia ekonomike e qeverisë.
Si kudo në Shqipëri, edhe këtu Ramavirusi ka shkatërruar ekonominë dhe vendet e punës, duke shtuar hallet për këta banorë të goditur rëndë edhe nga tërmeti i 26 nëntorit, thekson Lulzim Basha në reagimin e tij përmes rrjetit social Facebook pas këtij takimi:
“Ramavirusi është pandemia që torturon tash 7 vjet shqiptarët. Asnjë popull nuk ka paguar rritje taksash këto 7 vite si shqiptarët. Asnjë popull nuk ka paguar rritje të faturave të energjisë, rritje të çmimit të karburantit si shqiptarët. Kur erdhi dita që njerëzit kishin më shumë nevojë për përkrahje nga buxheti, Edi Rama i braktisi.
Në vend që të ndihmonte qytetarët paratë vazhdoi ti çonte te oligarkët.
Vetëm pardje thesari i shtetit pagoi 700 mijë euro të parave tuaja, të taksave tuaja për inceneratorin e Tiranës. Për ti hapur rrugë ndërtimit të kullave, shembi Teatrin dhe do të marrë 30 milionë euro borxh.
Sepse interesi i Edi Ramës nuk janë qytetarët që sot janë në pamundësi.
Që ekonomia të rimëkëmbet pas shkatërrimit nga Ramavirusi, që të ulet papunësia dhe shqiptarët të jetojnë në normalitet, Kryetari i Partisë Demokratike vlerëson se duhet urgjentisht një qeveri që mendon e kujdeset për njerëzit ndërsa premton:
“Unë dhe Partia Demokratike kemi vullnetin, vizionin, përvojën dhe dëshirën për t’i shërbyer qytetarëve.”
Vërtet nuk ka ende vaksinë për koronavirusin, por ka vaksinë për Ramavirusin, tha Kryetari i Partisë Demokratike, Lulzim Basha, para banorëve në zonën e Kënetës në Durrës, dhe ky është bashkimi ynë për të sjellë ndryshimin që pret çdo shqiptar ndërsa përfundoi:
Një qeveri normale për t’i garantuar qytetarëve një jetë normale dhe me dinjitet.
