Durrës, në Qendrën e pritjes emigrantët nuk presin – arratisen! AMP fillon hetimet

Njëmbëdhjetë emigrantë të paligjshëm janë arratisur mbrëmjen e djeshme nga Qendra e pritjes në Karreç të Durrësit.

Nuk dihet nëse këta emigrantët kanë patur ndihmë për t’u larguar nga Qendra, e cila është nën kontrollin e policisë, por, që të gjithë janë kapur më herët nga autoritetet shqiptare në tentativë për të kaluar ilegalisht kufirin, të ndihmuar dhe nga grupe kriminale që merren me trafikimin e emigrantëve të paligjshëm.

Për këtë arsye mësohet se AMP ka nisur një hetim brenda qendrës ku janë marrë në pyetje efektivët që kanë qënë në shërbim gjatë momentit kur ka ndodhur arratisja.

Ndryshe, Qendra e mbyllur për të huaj, Karec ka qëllim strehimin e të huajve të parregullt në territorin e Republikës së Shqipërisë, ndaj te cilëve është marrë një masë ndalimi në përputhje me legjislacionin ne fuqi, individë të ndaluar për kalim të paligjshëm kufiri, si edhe azilkërkues potenciale.

Qendra e mbyllur është një strukture në varësi të Drejtorisë se Migracionit, pjesë e Departamentit për Kufirin dhe Migracionin, në Drejtorinë e Përgjithshme të Policisë së Shtetit.