Durrës Yachts & Marina, nënshkruhet marrëveshja përfundimtare, Balluku: Tani nis zbatimi

Projekti 2 miliardë euro i Durrës Yachts & Marina kaloi fazën finale burokratike sa i takon marrëveshjes mes palëve dhe hapi i radhës është zbatimi.

Kështu u shpreh gjatë ceremonisë së nënshkrimit të marrëveshjes përfundimtare, ministrja e Infrastrukturës dhe Energjisë, Belinda Balluku.

“Ky është hapi përfundimtar i një procesi të gjatë që e kemi bërë transparent dhe e kemi ndarë me publikun.

Kjo është kontrata përfundimtare pasi kemi kaluar të gjithë hapat duke nisur nga AIDA nga letra e interesit nga investitori në atë kohë dhe të gjithë hapat e tjerë në një negocim shumë të gjatë dhe më pas deri në aprovimin nga Parlamenti dhe sigurisht dekretimin e këtij ligji të posaçëm nga Presidenti.

Ky është projekti më i madh ekonomik që Shqipëria ka pasur ndonjëherë dhe për herë të parë shteti shqiptar është bashkëaksioner në një projekt që do të ketë vlerë investimi rreth 2 miliardë euro. Për me tepër duhet të kemi parasysh që ky projekt do të ndryshojë pamjen për të gjithë rajonin.

Kemi pasur rastin të shohim në dy momente hapjen e zyrave sa i takon tregtimit të njësive të banimit në Durrës dhe Tiranë dhe interesi ka qenë i madh ashtu siç ka qenë interesi i madh edhe nga kërkesat online sipas investitori. Interes nga qytetarë nga e gjithë bota dhe nga diaspora shqiptare që do të ketë njësi banimi në këtë projekt. Sigurisht nuk ka qenë e lehtë të negociohet. Ishte një rrugë e re por sot kemi një grup të përgatitur për projekte të kësaj madhësie dhe natyre.

Duhet thënë që ky projekt edhe për pjesëmarrjen e shtetit në këtë investim parashikon krijimin e një kompanie të përbashkët ku shteti që është aksionet në masën 33 për qind, ka të gjitha përfitimet e një aksioneri në të ardhura dhe fitim.

Shteti ka përgjegjësi të ruajë asetet e tij strategjike që në Durrës janë kalatat, baseni dhe kanali i portit. Të gjitha këto mbeten pronë shtet siç mbetet dhe 45 për qind e hapësirës së portit aktual që do të rehabilitohet dhe ti kthehet në përdorim vizitorëve dhe banorëve të Durrësit. Përveç atyre me njësi banimi qytetarët e Durrësit do kenë akses në vijën bregdetare.

Ky zhvillim ridimensionon dhe fuqinë dhe përgjegjësinë e Autoritetit Portual Durrës duke na dhënë mundësinë të bëjmë një reformë të thellë sa i takon këtij autoriteti të rëndësishëm” tha Balluku.

Investitori Mohamed Alabbar u ndal më shumë në procesin e negocimit të projektit sesa në detaje të tij duke nënvizuar vetëm se ky do të jetë një projekt tërësisht inovator ku do të zhvillohen aspekte që nuk i gjen as në Dubai ndërkohë sipas tij modeli i zhvillimit do të jetë ai i qëndrueshëm si për energjinë edhe për menaxhimin e mbetjeve.

Kryeministri Rama deklaroi se Durrës Marina hyn në ekonominë shqiptare si lokomotive që do sjellë ndikim të jashtëzakonshëm në rritjen e shpejtësisë së zhvillimit ekonomik por edhe si konkurrent në një treg të ri, atë ndërkombëtar ku do të ofrojë jo vetëm shërbime të një cilësie të padiskutueshme por edhe punësim cilësor.

Sipas kreut të qeverisë profilet e punës do të jenë të mirëpaguara dhe për ata që duan realisht të punojnë është një formë e mirë që të shohin të ardhmen e tyre këtu dhe jo jashtë.

Porti i ri në Porto Romano

Gjatë nënshkrimit të marrëveshjes ministrja Balluku u ndal edhe te Porti i ri në Porto Romano. Sipas saj. Durrësi tani do të bëhet me dy porte një port turistik i Marinës dhe Jahteve dhe nga ana tjetër, porti tregtar i Porto Romanos.

Sipas Ballukut interesi për këtë projekt është i lartë nga kompanitë e huaja. Në datën 1 shkurt kompania holandeze e kontraktuar nga qeveria shqiptare do të bëjë prezantimin e projektit të detajuar inxhinierik dhe janë të paktën 40 kompani që kanë shfaqur interes për të qenë pjesë e kësaj tryeze.

“Ky do të jetë port i lidhur me dy porte të thata një në Prishtinë dhe një në Strugë dhe tashmë kemi marrëveshje me qeverinë e Kosovës dhe Maqedoninë e Veriut.

Ka disa shifra krahasuese, flasim për një port që do shtrihet në 450 hektarë. Është një port që është studiuar për të qenë i aksesuesëhm për 3-4 dekada dhe do akomodojë anije të mëdha pasi thellësia do të jetë mbi 16 metra.

Këto projekte do ta kthejnë Durrësin në pikë kyçe dhe reference për Ballkanin dhe Mesdheun” tha Balluku./Monitor/