Durrësi nën pushtetin e ujit, Min.Mbrojtjes: Kemi evakuar disa familje; Banorët: Nuk na ka vizituar njeri

Pas reshjeve intensive të shiut në Bashkinë Durrës dhe përmbytjes së 300 banesave dhe 40 Ha tokë bujqësore, Ministria e Mbrojtjes raporton se gjatë gjithë natës dhe sot vazhdon puna nga forcat në terren për largimin e ujit nga zonat e prekura. Ndërkohë banorët në zonat e përmbytura theksojnë se po vazhdojnë vetë largimin e ujit dhe nuk i ka vizituar njeri as nga pushteti lokal as nga ai qendror edhe kur kanë kërkuar ndihmë për evakuimin e të sëmurëve.

Kështu, sipas Ministris Mbrojtjes, problematika më të theksuara kanë rrugët dytësore në zonën e Durrësit të Ri, Shkozetit, Gjykata e Apelit, pjesërisht Zona e Plazhit.

– Ka prani të ujit në një numër të konsiderueshëm banesash dhe ambientet publike.

– Eshtë bërë evakuimi i disa familjeve, të cilat janë akomoduar te Kavalishenca.

– Sipërfaqja e tokës bujqësore nën ujë llogaritet në rreth 40 Ha.

– Ka një rritje të lehtë të niveleve të lumenjve Ishëm dhe Erzen, por pa rrezik për daljen nga shtrati.

– Hidrovorët në Hamallaj dhe Porto Romano vijojnë punën me kapacitet të plotë

– Në terren janë të angazhuara forca nga MZSH, Autoriteti Portual, Bordi i Kullimit, ndërmarrjet e punëve publike të bashkisë.

– Në mbështetje të forcave në terren janë angazhuar 2 pompa thithëse me kapacitet të lartë dhe 3 kamionë të kalueshmërisë së lartë nga Forcat e Armatosura.

– Gjatë natës kapacitetet nga FA u përforcuan edhe me 2 pompa të vogla nga batalioni i mbështetjes Poshnjë, të cilat janë duke punuar për largimin e ujit te IEPV Durrës, thekson Ministria e Mbrojtjes duke theksuar se Grupet e punës janë në terren për identifikimin, vlerësimin dhe raportimin e saktë të dëmeve.

Ndërkohë Bashkia Durrës thekson se të gjitha grupet e saj, mjetet e rënda, punonjësit e ndërmarrjeve dhe zjarrfikësit janë në terren duke punuar për largimin e ujit nga banesat.

“Aktualisht prania e ujit është në shumë banesa në zonën e Durresit te Ri, Shkozet, Nishtulla, kryqëzimi pranë IEVP.

Uji ka hyrë në rreth 300 banesa në total, nga të cilat 200 shtëpi janë ne zonën e Durrësit të Ri, 60 në zonën e Shkozetit dhe Plazhit, 4 banesa në njësinë administrative 4, 1 shtëpi në njësinë 1, 20 banesa në Sukth, 10 në Katund të Ri dhe 5 shtepi në Rrashbull.

Teksa situata në akset kryesore rrugore në Durrës është normalizuar, zona e Durrësit te Ri, Nishtulla, Shkozet dhe Plazh ka problematika,” thekson Bashkia Durrës ndërsa Shtabi i Emergjencës bën me dije se katër familje janë evakuuar.

Po realiteti…

Përmbytjet e paralajmëruara në Durrës kanë përballë sërish qytetarin me një fatkeqësi që siç thonë ata nuk ka të bëjë me reshjet e shiut pavarësisht intensitetit ndërsa shtetin ende nuk e kanë parë.

“Jemi përmbytur edhe herë të tjera, por jo në këtë masë që jemi përmbytur këtë herë. Problemi është kanali kryesor që del nga shtrati dhe na përmbyt, nuk janë reshjet e shiut. Na ka hyrë uji brenda, kemi ngelur gjithë natën nëpër dritare. Shteti duhet të ndërhyjë për kanalin, Bashkia Durrës ta vendosë në projekt kanalin, është hera e tretë që na përmbyt,” tha një banor derisa tjetri shton:

“Edhe brenda në shtëpi rrimë me çizme, ka dëmtuar çdo gjë që ka kapur uji. Jemi përmbytur se uji në kanal ka dalë sipër rrugës. Kanalet kulluese i mbyllën kur u bë rruga, kërkuam që të futej një tubacion, por nuk pranuan. Kanali i madh nuk e përballon, kanalet kulluese e dërgonin ujin tek një kanal tjetër.”

“Gjithë natëns ka pasur ujë. Asnjë s’ka ardhur akoma, i kemi njoftuar, ndoshta kanë qenë të zënë. Të gjitha dhomat i kam me ujë, mobiljet të prishura. Këtu e kemi kaluar natën, në ujë. Jemi vetëm unë me bashkëshortin. Ka qenë plot e mbushur me ujë, kam gjithë natën me fshesë në dorë, gjithë natën. Kemi telefonuar, janë përgjigjur e s’kanë ardhur. Secili shikon hallin e vet, të gjitha janë prishur, me ujë të gjitha.  U munduam të ngrinim pak divanët por janë të gjithë nën ujë,” shprehet një banore, teksa tregon dëmet në shtëpinë e saj ndërsa një çift bashkëshortësh në një nga lagjet e Durrësit teksa përpiqet të largojë ujin që ndodhet ende brenda në banesën e tyre ka dhe një hall tjetër përveç përmbytjes:

“Me të sëmurë brenda, i kemi lajmëruar, s’kanë ardhur. Askush s’ka ardhur, erdhi një njeri mbrëmë, dy fjalë e iku. S’e njohëm. Kujt t’i kërkojmë ndihmë, asnjë s’ka ardhur. Në orën 4 pasdite është përmbytyur banesa. Përfaqësuesi i bashkisë pyeti kur erdhi, ai më tha jam me temperaturë dhe iku.”

Pavarësisht zellit rilindas për propagandë, dora e shtetit përveç se nuk u u pa në familje nuk ishte as në bizneset e dëmtuara, aty ku e kërkon çdo ditë lekun. I tillë është rasti i një zonje, zyra e së cilës është përmbytur dhe sot biznesi i saj nuk është funksional.  

“Askush s’ka ardhur, kur të mbarojë ujë do vijë, sa kemi ne ujë s’ka ardhur njeri. Shiheni si është bërë zyra ime, me këtë ha bukë, çfarë të bëjmë?! Dokumentet, ç’të themi më, më shumë. Nuk e shohin emergjencat se çfarë bëhet në Durrës, sigurisht që po, sot s’ka nevojë të vijnë. Gjithë natën, është përmbyt kati i parë, janë djegur të gjitha pajisjet. Në ujë kemi ndenjur gjithë natën.” 

Në këtë situatë, ku banorët po luftojnë me ujin, ata janë shumë të qartë se shteti nuk do të mungoj kur uji të jetë tërhequr edhe ata edhe me procesverbal do ta konstatojnë situatën.