Dvorani mafioz dhe Vorpsi kaçurrel!
nga Agim Popoci
Reforma në Drejtësi në shumë raste, që nga fillimi i zbatimit të saj, ka sjell shumë situata komike deri tragji-komike ku shqiptarët janë dëshmitarë se si po shkërmoqet Drejtësia edhe në sy të ndërkombëtarëve. Por, rasti me Gjykatën Kushtetuese ka kaluar të gjithë kufijtë e së keqes, madje edhe traun e Kastratit në Rrugën e Kombit duke na dhënë një pasqyrë të shëmtuar të Gardianit të Kushtetutës dhe atyre që janë në shërbim të saj!
Ndërkombëtarët që më kot mundohen ta balancojnë ecjen përpara të kësaj Reforme tashmë është e qartë se duhet ta lexojnë përrallën “Çufoja dhe Bubi kaçurrel” në mënyrë që të kuptojnë se çfarë po ndodhë me Gjykatën Kushtetuese.
Ardian Dvorani në krye KED, për të gjithë qytetarët e Shqipërisë ishte mafioz pa e thënë Presidenti i Republikës, Ilir Meta, dhe arsye kryesore ishte vetë Meta. Si derrkuc i mbijetoi drejtësisë së Enver Hoxhës, ku si gjyqtar “vrau dhe preu” pa i hyrë gjemb në këmbë, për tu bërë edhe gjyqtarë demokracie të cilës i shërbeu sërish deri në kufijtë e një mafie.
Ky mafioz, siç thotë Presidenti, e la të lirë Ilir Metën me urdhër partie me arsyetimin se videoja që iu transmetua publikut ishte e paligjshme, pa e kuptuar shqiptarët se i kujt ishte ai mal me para që numëronte Meta me Dritan Priftin, si nisi dhe u shua 21 Janari dhe pse e braktisi Sali Berishën ky njeri me urdhër të Beogradit zyrtar, për të vazhduar qeverisjen me të gjitha qelbësirat e këtij vendi.
EURALIUS, OPDAT, ONM dhe çudira të tjera që i ofrohen këtij populli me qëllim të vënies në shina të Drejtësisë së çakërdisur nga krimineli Enver Hoxha, mund të jenë tronditur kur Presidenti i Republikës akuzoi të preferuarin tyre Ardian Dvorani, si mafioz, por vërtetë është i tillë! Ky derrkuc që u shërbeu diktatorit Enver Hoxha, regjimit saliho-metist dhe diktatorit Edi Rama, ka shumë mëkate mbi shpinë, e për ta graduar, mafioz, mjafton fakti që Ilir Meta është i lirë!
Por partia me derrkucin e tij nuk pushuan vetëm me lirinë e Ilir Metës dhe rrëzimin e Sali Berishës. Nga maja e Gjykatës së Lartë zhvendosën Dvoranin tek Këshilli i Emërimeve në Drejtësi për ti vënë pikën çdo shërbëtori besnik të partisë, qoftë ai edhe një doktor i shkencave nga Universiteti i Vjenës si Arta Vorpsi, që anëtare e Gjykatës Kushtetuese do të bëhet për ti shërbyer partisë dhe jo për të mbrojtur Kushtetutën.
Vjena zyrtare me të drejtë ankohet për eksportin e krimit nga Shqipëria, por çfarë duhet të thonë shqiptarët kur po kjo Vjenë i sjell shtetit shqiptar një Dr.iur nga Universiteti i Vjenës me temën e mbrojtur “Shteti i së drejtës dhe kontrolli kushtetues. Vështrim krahasues mbi teorinë e shtetit të së drejtës dhe Gjykatën Kushtetuese të Austrisë dhe të Shqipërisë”, e cila për tu bërë anëtare e Gjykatës Kushtetuese shkon dhe betohet Noteri! Dhe, kujdes, kemi të bëjmë me Austrinë, aty ku për herë të parë u themeluar institucioni i Gjykatës Kushtetuese, më 1920, e më pas u zgjerua edhe tek shtetet tjera evropiane dhe të botës.
Nëse Shqipëria mund të ketë eksportuar 1.000 kriminelë në Austri përgjatë gjithë periudhës së tranzicionit, sa kriminel mund të prodhoj një gjyqtare “e certifikuar” në Vjenë, e cila duke shkelur Kushtetutën mendon se mund të bëhet anëtare e Gjykatës Kushtetuese me urdhër të Partisë dhe bekimin e një Notere!
Po flasim për Arta Vorpsin me formim universitar sepse nuk ka shqiptarë në këtë vend që ka mendim të mirë për një noter, qoftë ai dhe Miranda Xhemalçe e cila i ka shërbyer për gjashtë vjet një Doktoreje të shkencave të shkolluar në Vjenë!
Në fund, nuk tha njeri që në shtetin e Edi Ramës një Vorps Kaçurel nuk mund të bëhet anëtare e Gjykatës Kushtetuese edhe nëse është betuar tek Noteri, kur Dërrkuci Dvorani bëhet kreu i KED edhe pse e la të lirë Ilir Metën në shkelje të hapur të ligjit; Dhe, Arta Vorpsi mund t’ju ketë bërë kaçurrel edhe trutë përfaqësuesve të EURALIUS dhe OPDAT-it, siç po mundohet t’ju bëjë sot shqiptarëve edhe shoku Taulant me Komisionin e Venecias! Por, sipas Kushtetutës së Republikës së Shqipërisë, e cila sot është në fuqi, betimi i anëtarit të Gjykatës Kushtetuese bëhet para Presidentit Republikës, qoftë ai edhe Ilir Meta të cilin Derrkuci Dvorani e la të lirë.
