Dy diplomatë nga 5 shtete të që nuk e kanë njohur Kosovën, BE i angazhon në dialogun Kosovë-Serbi
Mirosllav Lajçak u propozua edhe zyrtarisht Përfaqësues i posaçëm i Bashkimit Evropian për dialogun Kosovë-Serbi. Këtë e kanë konfirmuar për RFE burimet diplomatike në Bruksel duke saktuar se shefi i politikës së Jashtme të BE, Joseph Borrell, u ka dorëzuar vendeve anëtare të Bashkimit Europian emrin e Lajçakut si përfaqësues i ardhshëm i bllokut, i cili para së gjithash do të merret me normalizimin e marrëdhënieve midis Kosovës dhe Serbisë, por edhe me çështje të tjera në rajon.
Propozimi formal i Lajçakut mësohet se ka qenë edhe arsyeja e bisedave telefonike që Borrell ka zhvilluar dje me Presidentin e Serbisë, Aleksandar Vuçiq, Presidentin e Kosovës, Hashim Thaçi, dhe Kryeministrin e Kosovës, Albin Kurti.
Pritet që emërimi i Lajçakut në detyrën e re të bëhet më 23 mars, në takimin e ministrave të Jashtëm të vendeve të Bashkimit Evropian pasi emërimi i mëhershëm thuhet se nuk është i mundur pasi ai vazhdon të kryejë funksionin e ministrit të Jashtëm të Sllovakisë. Deri në takimin e ardhshëm të ministrave të BE-së, Lajçak do ta përfundojë mandatin si ministër në Qeverinë e Sllovakisë, pasi në këtë vend, më 29 shkurt, mbahen zgjedhjet parlamentare.
Pas propozimit formal do të ketë debate të grupeve të ndryshme të punës, si dhe në Komitetin e Sigurisë Politike të BE-së, ndërsa vula përfundimtare do të jepet në Këshillin e Ministrave të BE-së.
Për Përfaqësuesin e posaçëm të Bashkimit Europian duhet miratimi i të gjitha vendeve anëtare. Ai do të bëhet pjesë institucionale e sistemit dhe do t’i përgjigjet jo vetëm përfaqësuesit të lartë të BE-së, në këtë rast Borrellit, por edhe Këshillit të Ministrave të BE.
Kështu pas shefit të diplomacisë europiane, Borrell që vjen nga Spanja, Mirosllav Lajçak është diplomati i dytë që vjen nga një shtet i BE që nuk e ka njohur Kosovën dhe anagzhohet në dialogun Kosovë-Serbi. Nëse kësaj i shtohet edhe fakti se Lajçak është Përfaqësuesi i BE më i dështuar në misioni e tij në Bosnje, atëherë qytetarët e Kosovës nuk kanë arsye të kthejnë sytë në tjetër drejtim përveç se nga krijuesi, SHBA.
