Dy muaj pas tërmetit tragjik, Basha: Edi Rama prodhoi vetëm korrupsion dhe gënjeshtra!

Pas spketaklit të radhës me Platformën Online dhe premtimet e rindërtimit nga Kryeministri Edi Rama, dy muaj pas tërmetit tragjik të 26 nëntorit, duke përkujtuar me dhimbje 51 jetët e humbura, Kryetari i Partisë Demokratike, Lulzim Basha thekson që të gjithë jemi dëshmitarë se si shteti i babëzisë dhe korrupsionit ka dështuar në çdo detyrë.

“Sot nuk ka ende një faturë reale dëmesh të vlerësuara. Sot nuk ka ende një vlerësim përfundimtar të objekteve të pabanueshme dhe të dëmtuara. Sot ka ende mijëra familje që kalojnë ditët e ftohta nëpër çadra, pa asnjë ndihmë nga shteti,” konstaton me keqardhje Lulzim Basha ndërsa qytetarët vazhdojnë të sorollaten nga njëra zyrë në tjetrën për të marrë bonusin e qerasë.

“Sot ka mijëra qytetarë të cilët nuk kanë ku të fusin kokën dhe nga dëshpërimi, janë futur në banesat e dëmtuara duke rrezikuar kështu jetën e tyre dhe të fëmijëve. Sot fëmijë e të moshuar janë në gjendje të rënduar shëndetësore për shkak të kushteve të vështira në të cilat po mbijetojnë që prej dëmtimit të shtëpive.”

Ende banorët pyesin se çfarë do të bëhet me shtëpitë e tyre, por nuk marrin përgjigje. Ende sot nuk ka asnjë masë për të ndihmuar në ringritjen e biznesit në Durrës e në zona të tjera të dëmtuara nga tërmeti, konstaton lideri i Opozitës së Bashkuar përmes një reagimi në rrjetin social Facebook duke theksuar gjithashtu se janë shumë biznese që po mbyllen e qindra qytetarë po mbeten pa punë.

“Sot është e qartë për qytetarët se kjo qeveri dhe ky kryeministër i dështuar prodhon vetëm gënjeshtra dhe korrupsion, gjë të cilën e vërtetoi edhe raporti i Transparency International.”

Nëse 150 milion dollarët që Edi Rama u jep 10 oligarkëve do të ishin akorduar për qytetarët, sot do të ishin strehuar në banesa me qera cdo qytetar që është lënë në mëshirë të fatit,” shprehet qartë Kryetari i Partisë Demokratike, dhe nëse qeveria do të kishte miratuar paketën ndihmëse për biznesin e dëmtuar, do të kishte nisur rimëkëmbja.

Ndërkohë për krimin shtetëror në Thumanë që mori 24 jetë, nuk ka asnjë të arrestuar, asnjë hetim serioz, vetëm heshtje nga prokuroria politike që mbron Dakon dhe Bushin me urdhër të Edi Ramës, vlerëson Kryetari i Partisë Demokratie, Lulzim Basha, duke përfunduar:

“Çdo ditë dështimi dhe mashtrimesh, është një ditë vuajtjesh më shumë, një mundësi e humbur për tu ardhur në ndihmë qytetarëve në nevojë dhe për të kontribuar në rimëkëmbjen ekonomike dhe rikthimin në normalitet të jetës së mijëra familjeve. Dhimbja dhe vuajtja e tyre nuk mund të kapërcehen me lugën bosh të një kryeministri të dështuar.”