Dy shqiptarë, dy gola, dhe rusë e serbë bashkë kundër tyre…

“Nga të gjithë lojtarët, duhej të ishin ata. Papritmas, në minutën e fundit, Xherdan Shaqiri po shkëputej, serbët po e ndiqnin por pa qenë në gjendje ta kapnin para se ai ta çonte topin nën këmbët e Vladimir Stojkovicit. Ishte një gol që mposhti Serbinë dhe e vuri Zvicrën në një pozicion shumë të mirë për të kaluar në raundin tjetër, por njëkohësisht ishte shumë më shumë se një ndeshje”.

Kështu shkruan britanikia The Guardian në lidhje me ndeshjen e luajtur mbrëmjen e djeshme në kuadër të botërorit Rusia 2018, mes Zvicrës dhe Serbisë.

Prestigjiozia britanike përshkruan festimin e futbollistit kosovar, Xherdan Shaqirit, të shënuar në minutën e 90-të, me këto fjalë: “Teksa u kthye dhe bërtiti e hoqi fanellën, i shtrëngoi muskujt dhe interpretoi simbolin e shqiponjës dykrerëshe, që është rikrijim i flamurit shqiptar. Përkrah tij, Granit Xhaka e bëri të njëjtën gjë, për herë të dytë”.

Xhaka e shënoi golin e barazimit me një goditje të fuqishme nga 18 metra, ndërsa Shaqiri atë të fitores.

“Dy shqiptarë, dy gola, në një stadium ku tifozët rusë dhe serbë ishin bashkuar, duke përkrahur një ekip që Shaqiri dhe Xhaka nuk e shohin thjesht si kundërshtar. Shaqiri pati flamurin e Kosovës të ngjitur në këpucën e tij. Babai i Xhakës ishte burgosur dhe rrahur në ish-Jugosllavi për shkak se kishte bërë fushatë në favor të pavarësisë së Kosovës dhe vëllai i tij, Taulanti, luan për Shqipërinë. Së bashku me Valon Berhramin, ata u vërshëllyen nga një turmë që brohoriste ‘Serbia-Rusia!’ ‘Serbia-Rusia!’ Ndërsa një pankartë i shpalli dy vendet ‘vëllazërore’”, shkruan me tej Guradian.