Dy vjet pa Madeleine Albright, Osmani: Trashëgimia e saj është skalitur në strukturën e vendit tonë
Në dy vjetorin e ndarjes nga jeta të Ish-Sekretares amerikane të Shtetit, Madeleine Albright, Presidentja e Kosovës, Vjosa Osmani, tha se trashëgimia e saj është skalitur jo vetëm në faqet e historisë sonë, por edhe në strukturën e vendit tonë
“Në 2-vjetorin e ndarjes nga jeta, ne nderuam ish-sekretaren Madeleine Albright. Trashëgimia e saj është skalitur jo vetëm në faqet e historisë sonë, por edhe në strukturën e vendit tonë,” tha Presidentja e Kosovës, Vjosa Osmani, përmes rrjetit social X, pas homazheve në nderim të jetës dhe veprës së Ish-Sekretares Madeleine Albright në dy vjetorin e ndarjes nga jeta ndërsa përfundoi:
On the 2nd anniversary of her passing, we paid tribute to former Secretary Madeleine Albright.
— Vjosa Osmani (@VjosaOsmaniPRKS) March 23, 2024
Her legacy is etched not just in the pages of our history but in the very fabric of our country. We will forever remember her relentless contribution to our freedom and democracy. pic.twitter.com/xbDjbcIsvY
“Ne do ta kujtojmë përgjithmonë kontributin e saj të pamëshirshëm për lirinë dhe demokracinë tonë!”
Ndryshe, Ish-Sekretarja amerikane e Shtetit, Madeleine Albright, ka ndërruar jetë më 23 Mars të vitit 2022 në moshën 84-vjeçare.
Madeleine Albright ka qenë Sekretare e Shtetit në kohën kur janë kryer sulmet e NATO-s mbi caqet serbe, që kanë çuar në çlirimin e Kosovës.
Albright vizitoi Kosovën në korrik të vitit 1999, një muaj pas përfundimit të luftës.
“Duke u ngritur kundër ish-liderit serb, Slobodan Milosheviç, i kemi ulur gjasat për një vullnet të ri të Milosheviçit. Duke ndërtuar paqen në Kosovë, ne do të ndihmojmë në stabilizimin e Ballkanit dhe në këtë mënyrë do të kontribuojmë në një Evropë të tërë dhe të lirë,” tha me këtë rast Albright.
Për kontributin e saj për çlirimin e Kosovës, më 2019, në përvjetorin e 20-të të hyrjes së trupave të NATO-s, në Prishtinë u zbulua busti për nder të saj.
Po në vitin 2019, Kosova e dekoroi Ish-Sekretaren Albright me Urdhrin e Lirisë.
Gjatë fjalimit në Prishtinë, më 12 qershor të vitit 2019, Albright deklaroi se vendimi për të ndërhyrë në Kosovë ishte i drejtë.
“Aleanca jonë ishte e bashkuar dhe e fortë dhe më e rëndësishmja është se ia dolëm për arsye se kauza e jonë ishte e drejtë dhe për arsye të qytetarëve të Kosovës përtej të gjitha pyetjeve, praktikave dhe politikave,” u shpreh me këtë rast Ish-Sekretarja amerikane e Shtetit, Madeleine Albright.
