Dy vjet qeverisje, Kryetari i Komunës: Mitrovica e Veriut më e lirë dhe pa banda!

Pas dy viteve qeverisje dhe rezistencë ndaj sulmeve kriminale e terroriste serbe përmes subjektit Lista Srpska, Kryetari i Komunës Mitrovicë e Veriut, Erden Atiq, vlerson sot se tani bandat janë shpartalluar dhe ky qytet tashmë frymon shumë më lirshëm.

“Po bëhen 2 vite nga marrja e qeverisjes komunale në komunën e Mitrovicës së Veriut nga ana jonë. Për këto 2 vite u përballëm me shumë sulme kriminale me dirigjim politik nga Beogradi, përmes subjektit të vet satelit këtu, Listën serbe, që udhëhiqte me komunën.

Sot, pas 2 vitesh rezistencë ndaj sulmeve kriminale e terroriste, bandat janë shpartalluar dhe qyteti frymon shumë më lirshëm,” thekson Erden Atiq në reagimin e tij përmes rrjetit social Facebook duke konstatuar se sot qytetarët janë të lirë, ndërkohë që edhe komuna është e gjithë qytetarëve pa dallim ndërsa përfundon:

“Kishte shumë sugjerime dashakeqe ato ditë që të dilnim nga komuna, fatkeqësisht edhe nga opozita në Prishtinë, por imagjinoni si do të ishte sot Mitrovica e Veriut, dhe veriu në përgjithësi po të dëgjoheshin këta zëra.”