Dy vota për një qytetar, PD: KQZ të japë llogari për zarfat e dyshimtë dhe të pastrojë emrat e dubluar
Partia Demokratike ka bërë të ditur sot përmes përfaqësuesit Ligjor të PD në KQZ, Franc Nuri, se ka depozituar së fundi dy shkresa, njëra që lidhet me emrat e dubluar në lista dhe tjetra për disa raste të dorëzimit të zarfeve nga qytetarë të cilët janë paraqitur në ambiente të ndryshme dhe komisioni mund t’i ketë depozituar në protokoll votat.
“Atëherë, për të sqaruar, do të flas për shkresën e fundit që kemi depozituar në KQZ. Bëhet fjalë për problematikën që lidhet me emrat e dubluar në lista. Është një problematikë që ne e kemi evidentuar, disa emra, që mund të jenë rreth 100 apo 137 për të qenë më të saktë, sipas numrit që ne patëm mundësinë të verifikonim para dy javësh, dhe prej disa ditësh nuk kemi marrë ende një përgjigje zyrtare nga Komisioni Qendror i Zgjedhjeve.
Bëhet fjalë për emra të dubluar, që do të thotë se një person është regjistruar në platformë për të votuar dhe supozohet që vota e tij të ketë shkuar nga diaspora, ndërkohë që emri i po këtij personi figuron edhe në listat zgjedhore në Shqipëri. Këto emra duhet të pastrohen. Kjo gjë duhet të kishte ndodhur tashmë, por ne ende nuk kemi marrë përgjigje zyrtare. Presim që këto lista zgjedhore të pastrohen plotësisht nga emrat e dubluar, në mënyrë që të mos ketë asnjë individ me mundësi që të ketë votuar nga diaspora dhe të vijë më pas edhe të votojë fizikisht, apo të tentojë të votojë dy herë, sepse kjo do të ishte një shkelje zgjedhore shumë e rëndë,” tha Franc Nuri duke saktësuar se Partia Demokratike pret një përgjigje zyrtare nga KQZ sa më shpejt.
“Kërkesa e dytë që kemi bërë është se kemi ardhur në dijeni të disa rasteve që kanë të bëjnë me dorëzimin e zarfeve nga individë, qytetarë, të cilët janë paraqitur në ambiente të ndryshme dhe komisioni mund t’i ketë depozituar në protokoll votat, ose kanë tentuar t’i depozitojnë në protokoll, ose mund t’i kenë sjellë jashtë kanalit zyrtar përmes postës ndërkombëtare, ndryshe nga rregulli i përcaktuar.
Kemi bërë një kërkesë urgjente për të marrë informacion për këtë çështje që prej ditës së djeshme, dhe ende në këtë moment nuk kemi informacion se sa raste të tilla kanë ndodhur, nga cilat shtete kanë ardhur këto zarfa, nëse janë dorëzuar fizikisht apo përmes rrugëve të tjera të komunikimit, dhe nga cila datë janë regjistruar si të mbërritura,” tha përfaqësuesi Ligjor i PD në KQZ, Franc Nuri, duke përfunduar:
“Këtë kërkesë po e përsërisim edhe këtu publikisht dhe kërkojmë urgjentisht nga KQZ të na vërë në dispozicion informacion të plotë për këto shqetësime që kemi ngritur.”
