Dynjaja e Edi Ramës!

nga Agim Popoci

Deri sa shqiptarët po kalojnë ditët e tmerrit me ato që servir qeveria e tyre duke i terrorizuar në emër të parandalimit të përhapjes së COVID-19, mbrëmjen e së shtunës kishin rastin të shohin daljen e radhës së Kryeministrit Edi Rama, i cili duke u bazuar në të dhënat e bilancit, që ai e quan “të luftës”, na del se Shqipëria është më mirë se tërë dynjaja.

Nuk është e qartë se për cilën dynja e ka fjalën Edi Rama por në këtë dynjanë në të cilën shqiptarët jetojnë, Shqipëria është turp dhe faqja e zezë.

Strategji jo, plan jo, teste jo e jo, mjekësi jo që jo, qeverisje jo dhe jo, po ja që kur hap sytë e shikon, na del dhe Kryeministri mashtrues; Madje mashtrim me të vdekurit ndërsa krahasimi që bënë me shtetet e dynjasë përveç se manipulativ nuk përkon as me logjikën në të cilën jetojnë popujt tjerë dhe Kryeministrat e tyre.

Për të qenë më të qartë, po marrim Malin e Zi, që ka një qeverisje socialiste që vjen nga komunistët ashtu si Edi Rama, ka bregdetin dhe lidhje të jashtëzakonshme me Italinë kur koronavirusi bëri kërdinë dhe mendohet se përhapi infeksionin edhe në shumë vende të Evropës.

Në momentin kur Edi Rama publikoi dje të dhënat, Shqipëria kishte 789 të infektuar me koronavirus, 519 të shëruar dhe 31 të vdekur. Se ku i gjeti këta 11 të vdekur me të cilët mburret Kryeministri, nuk dihet, por në gjithë grafikun e tij shifrat janë të çakërdisura, në veçanti ato të fqinjëve. Po se harrova, meqë duhet për krahasim, Shqipëria zyrtarisht në janar të vitit 2020 kishte 2.845.955 banorë ndonëse realisht nuk janë as 2 milionë, e bazuar në listat zgjedhore kjo shifër është dukshëm më e ulët.

Shteti jonë fqinjë, Mali i Zi, ka 322 të prekur, 249 janë shëruar, dhe aktualisht janë 65 të infektuar me COVID-19. Në kohën kur Edi Rama mburrej mbrëmë, Mali Zi kishte 7 të vdekur dhe jo 11 siç ishte në grafikun e Ramës, madje ndërkohë ka vdekur dhe një i infektuar e sot që flasim janë 8 të vdekur nga COVID-19. Zyrtarisht Mali i Zi në janar të këtij viti kishte  631.219 banorë dhe bazuar në listat zgjedhore ky numër rezulton shumë i saktë!

Po e theksoj numrin e popullsisë për të kuptuar dhe krahasimin, për të mos harruar edhe faktin se mbi 30 mijë malazezë janë të angazhuar nëpër botë në transportin detar, përveç të tjerash, si rrezik i përhershëm për infeksioni me COVID-19. 

Në këtë dynjanë e Edi Ramës ku jemi më të mirët, përveç shpalljes së zonave të gjelbërta të disa zonave ku sot nuk ka as njerëz, mbrëmjen e së premtes ai tha se duke filluar prej nesër do të fillojnë të lëvizin taksitë me dy pasagjerë nëse janë të një familje; Më 11 Maj do të hapen parukeritë, klinikat dentare dhe qendrat tregtare; dhe më 18 Maj hapen bar-restorantet vetëm jashtë, dhe ndalohet çdo aktivitet kulturor/ artistik dhe çdo grumbullim.

Po si është situata në Mal të Zi! Më 18 Maj hapen 500 plazhe, dhe tashmë ka filluar pastrimi dhe përgatitja e plazheve ndonëse Kryeministri Dushko Markoviç nuk i ka terrorizuar dhe nuk i terrorizon qytetarët në Facebook. Ai nuk numëron të vdekurit ndërsa me raportimet dhe grafiqet merret Instituti i Shëndetit Publik.

Deri më sot kanë funksionuar 192 klinika dentare me leje të veçanta në Mal të Zi dhe nesër hapen edhe 350 të tjera, por në asnjë çast nuk janë kërcënuar për masat që duhet të marrin. Madje Dhoma e Stomatologëve të Malit të Zi, nuk shef Kryeministrin në Facebook për të kuptuar për fatin e tyre, por i kërkon shtetit që ti ndihmoj në furnizimin me maskat kirurgjike dhe mantele për një përdorim sepse kanë vështirësi për furnizimin e tyre. 

Të gjithë atyre që jetojnë në zonat rurale, kanë moshën e pensionit por jo edhe të drejtën për pension, përveç ndihmës sociale, në Mal të Zi aty ku është beter sipas Edi Ramës, janë ndarë nga 64 euro për person meqë nuk kishin mundësi për ti shitur prodhimet e tyre bujqësore.

Dynjaja e Edi Ramës nuk e din por nga 7 Maji në Podgoricë hapen të gjitha linjat ajrore komerciale madje edhe sot e pranojnë se Zagrebi nuk i kishte ndërprerë për asnjë çast fluturimet e Croatia Airlines dhe Eurowings, e deri vonë kishin funksionuar me Qatar, British, Turkish…

Qendra Kombëtare e Koordinimit, si Komiteti në dynjanë e Edi Ramës, meqë nuk drejtohet nga Kryeministri ka vendosur që nesër të hap të gjitha bizneset, kuptohet me masa të caktuara të sigurisë por jo me idiotizma si ajo e taksisë me dy familjar ose ndalimin e lëvizjen nga një qark në tjetrin.

Duke filluar prej nesër, në Mal të Zi të gjithë mund të shkojnë në peshkim, ndërsa atyre për det të hapur u duhet një konfirmim nëse kanë lejen për këtë aktivitet. Kush ka shtëpi në plazh ose alpe mund të shkoj që nesër ndërsa ata që do të punojnë tokën jashtë komunës ku jetojnë, janë të lirë të vazhdojnë punë në çdo cep të vendit posa ta raportojnë lëvizjen e tyre drejt një komune tjetër tek Instituti i Shëndetit Publik.

Fitnesi dhe bastoret që nesër hapen ndërsa janë parashikuar edhe bibliotekat, arkivat, muzetë dhe galeritë, që në dynjanë e Edi Ramës as që përmenden.

Në këtë dynjanë që nuk është e mirë si ajo e Edi Ramës dhe quhet Mali i Zi, nuk i është ndaluar hyrja shtetasve të këtij vendi madje as atyre që kanë leje-qëndrimi të rregullt, si dhe të gjithë marinarëve që vijnë për shkak të transportit detar.

Në këtë dynja që nuk është perfekt si Shqipëria, ndalimi i qarkullimit është nga ora 23:00 deri në orën 5:00 të mëngjesit ndërsa për ata të moshës së tretë, që Edi Rama mëshirohet të shtunave me leje për lëvizje, “Edi Rama i Malit të Zi” përveç se i trajton me dinjitet u ka siguruar edhe maska pa lekë, dhe shëndeti i tyre vazhdon të jetë prioritet shtetëror.

Kur vlen ndalim-qarkullimi në Shqipëri, Edi Rama u jep leje pensionistëve një herë një javë të lëvizin dhe mburret me këtë gjest fisnik, ndërkohë në Mal të Zi gjatë kohës së ndalim-qarkullimi lejohet që qytetarët që shëtisin kafshët shtëpiake por jo më shumë se 60 minuta.

Sa për nënat me fëmijë ky është kulmi i dynjasë që ka ideuar Edi Rama dhe sot mburret.

Po, Kryeministri u mëshirua dhe u dha leje nënave të shëtisin fëmijët deri në 10 vjeç, por e domosdoshme është që Edi Rama të dal nga Facebooku dhe të shoh se si torturohet një nën kur fëmija i kërkon një patatinë ose çokollatë dhe dyqanet janë mbyllur; E për ato nëna të stresuara që “guxojnë” ta harrojnë shishen me ujë, nuk është liri e lëvizjes por liri e lëvizjes nëpër makth.

Pse mallkon pastaj ky milet, kjo nuk është pyetje! Të dalësh nga Shkolla e Baletit deri tek Kodrat e Liqenit nuk është larg për Ramën dhe taksinë e tij të mesnatës, ama për një nënë që mbanë fëmijën i cili sapo ka filluar ta shijoj këtë dynjanë e Edi Ramës, dhe i hapen mushkëritë nga 1 milion pemët e Lali Erit, është shkencë!

Sa shumë vuajnë ata që nuk jetojnë në Shqipëri…