E filloi dhe e përmbylli fushatën me Metën, Rama: Like rrëmbe sëpatën, shko priji duart…
U shit si familjar duke nxjerr dhe djalin e vogël Zahon në Vlorë para mikrofonit, por Kryeministrit Edi Rama këtë familjarizëm ia hallakati edhe sonte në përmbylljen e fushatës si në Durrës ashtu dhe qytetin e flamurit, inati që ka me Presidentin e Republikës, Ilir Meta, me të cilin e nisi dhe e mbylli fushatën zgjedhore. Kështu dhe u ngatërrua deputeti i Durrësit, Vlorës dhe gjithë Shqipërisë i cili nuk komenton blerësit socialistë të votave por kur ata janë të LSI-së, hakërrehet mbi Metën edhe nëse duhet ta prish fushatën e tij përmbyllëse duke u marrë me Liken, mikun e tij të shkatërrimit tëShqipërisë.
Pas publikimit të videos me kandidatin e LSI, Etjon Joka, duke blerë vota, Rama nga Durrësi iu drejtua Metës, duke i thënë që tani duhet të rrëmbejë sëpatën e të shkojë t’i presë duart kandidatit të LSI, meqë Presidenti ishte zotuar se “kush prek votën më 25 prill, do t’i pritet dora”. Por Rama harroi se çfarë kishte thënë në Durrës dhe vetëm disa orë pas këtij prononcimi, ai në Vlorë po sonte thotë se Likja ishte zbutur, fliste për demokraci, festë demokracie të dielën, i harroi sfurqet, sëpatat, kërcënimet, dhe ishte bërë goxha i matur.
Meqë gallata ishte kryefjala e kësaj qeverie për 8 vjet, ai sot në Vlorë duke përmbyllur fushatën e PS, iu bëri thirrje vlonjatëve t’i japin nëntë mandate, duke premtuar se do ta bëjë qytetin bregdetar 12 herë më të bukur, nga ç’është tani.
“Po sot një deputet i Ilirit u kap duke vjedhur vota. Unë thashë tashi ti Like rrëmbe sëpatë, shko priti duart, mirëpo Likja nuk doli. Jo vetëm nuk doli, por lëshoi një postim “votoni, do jetë ditë feste, mos kini merak, ju vetëm votoni për demokracinë, vëllazërinë”. O Like, Like, ta kisha thënë o lëre rakinë, o do të ta nxjerrin me zor, dhe është më keq kur ta nxjerrin me zor, se kur e lë vetë. Tani mos dil më, rri mirë aty ku je, shumë mirë e the, jam dakord me ty, ditën e diel do të jetë ditë feste, ditën e diel të gjithë këta luanët e dalë nga zgafellat e historisë do të kthehen në lepuj, që të gjithë. Armata jonë e zemrave, mendjeve, qytetarisë, buzëqeshjeve, jo me klithma, britma, ulërima, sfurqe, sëpata, armë, por me zemër.
25 prilli është përplasja e fundit mes atyre që në historinë tonë kanë përfaqësuar një mallkim, që Shqipëria s’bëhet, që shqiptarët të shohin çfarë të kapin aty për aty, sepse këta janë vetëm ai mallkim që njëherë merr pamjen, emrin, zërin e Haxhi Qamilit, njëherë merr pamjet, emrin e zërin e Rrapush Xhaferrit, Sudes, Vehbiut, Saliut, pastaj merr pamjen e Lulit,” tha Rama dhe kaloi te plehrat në Porto Romano duke harruar ato që u krijuan nga shkatërrimi i trashëgimisë së këtij qyteti nga “Dako and Co”.
“Ju e mbani mend shumë mirë se me ujin ishte historia dembabadem, që kur vija unë këtu dhe shkonim te breshka, e prisnim radhën për ujë. Kujtesa ime e fundit është se çfarë keni hequr ju me plehrat, me atë zonën e kancerit atje në Porto Romano. Kam shkuar e i kam parë edhe vetë, derra që dukeshin si dinozaur, lopë që dukeshin si krokodilë, hanin plehra. Sot, edhe pak javë, aty do të jetë ecoparku më i madh e më i bukur i Ballkanit. Votoni 12, që ekonomia të ecë përpara. Mos ta rrejë mendjen njeri se kur ne flasim për fantazma të së shkuarës, gënjejmë, se ka Zot që i nxori lakuriq komplet, për t’ua kujtuar edhe njëherë shqiptarëve që ky është momenti që të mendoni për ta ndarë historinë në dysh. Votoni 12 dhe lërini ata t’i marrë lumi i historisë. Do t’i shikoni, pasi të përpëliten ca ditë apo ca javë, do të bëhen të gjithë qengja. Kujdes me atë 9, se 9-ta sa të kthesh kurrizin bëhet 6. Nuk është rastësi, janë lidhur gjërat. Nuk është rastësi që Likja është 6, Saliu 9 dhe ne 12. Është moment historik. Thanë sot mos shko në Durrës se ka shi, po ku është shiu. Unë në listë jam i 8, por që ta dini mirë të gjithë, numri im është 12.”
Dhe normalisht kur nuk ka çfarë të thotë janë arabët dhe projekti i protit që u shpik në ditët e fundit të 8 vjeçarit qeverisës:
“Me mal e me borë, mes dimrit, plazhe, e det, pllaja e liqene, i ka dhënë të gjitha zoti, ka thënë po ia bëj një dhuratë speciale, por ne, ne vetëm duke i rënë me shqelm të mirës që na i ka dhënë zoti. Nuk ka më. Këtu do bëjmë portin më të madh turistik të Mesdheut. Do e bëjmë Durrësin Dubain e vogël të Mesdheut, Nuk flas si Saliu, ke Lana bëjmë Zvicrën e Shqipërisë. Flas për projekt që e financon, e ndërton kompania më e madhe në botë për turizmin që ka dhe Marinën e Dubait. Marina e Durrësit do jetë e binjakëzuar me atë të Dubait, se është e njëjta dorë, të njëjtët klientë. Kur të shohin këtu se çfarë ushqimesh kemi ne, mish të freskët do i thonë Nusretit s’dua të të shoh më me sy. Qeshni, qeshi, shyqyr kjo nuk është një gjë që duhen 100 vjet për t’u provuar. Do vij prapë në 2025, do iu them a e mbani mend, dhe do ndiheni shumë krenar që më 25 prill ishim në anën e duhur historisë. Jo vetëm kaq, në atë port duhet mijëra e mijëra forca pune. Ne menjeherë do fillojmë punën për shkollën e lartë profesionale për ata që duan të punojnë aty, me llojet e shërbimeve.
E di si më tha ai zotëria, i sheh gjithë hotelet e plazhit, kur ne mbarojmë këtë punë, vlera e atyre, dhomave, banesave të qytetit do të shkojë lart e më lart. Të gjithë do kenë një pasuri të patundshme shumë me vlerë, por është porti tregtar. Nuk do e lemë Durrësit pa port tregtar. Të ndërtohet tek Porto Romani, aty ku ishte për derra, port tregtar që do kërkojë shumë krah pune. Gjërat do të ndryshojnë, së shpejti ka mbaruar gara, fillon po aty në Spitallë, parku me energji diellore. S’dua t’ju mbaj më gjatë, mua më njihni, e dini që i rri punës mbi kokë, ditë natë, nuk jam absolutisht aq i mirë sa për t’u marrë për dhëndër, por shyqyr jam i martuar, jam shumë i lumtur për gruan që kam, kush nuk më pëlqen, mjafton të lëvizë telekomandën, nuk i pëlqen si flas, çitjanet e mia, një copë fshatari jam, të shohin pantallonat e Saliut, Likes, ato këpucët e Lulit që duken sikur s’kanë.”
Dhe sërish gallatë, e në fjalimin e Kryeministrit Edi Rama rikthehet gomari:
“Për top model, për pamje për qejf, i keni ata, për gomar pune si unë s’keni. Zgjidhni e merrni se nuk kam parë ndonjë katunar, as ndonjë qytetar, që kur i duhet gomari me i marrë drutë, ta zgjedhë gomarin nga bukuria, ngjyra, se dhe aq i shëmtuar nuk jam, të thoni kaq i shëmtuar ky gomar as drutë nuk i dua. Po ju them kaq tani, fjala e fundit, ja u kam thënë në 2013, që do bëjmë për Durrësin më shumë se gjithë vitet jashtë. Tani që ka më shumë gjëra e di unë. Unë po ju them që, nga 2021 në 2025, unë dhe gjithë këta do bëjmë më shumë se çfarë është bërë në 100 vjet. Prandaj ke 12-ta. Lëreni numrin e djallit, tek 12-ta e pavarësisë. Tek 12-ta e pavarësisë. Tek 12-ta e 12 yjeve të flamurit të BE, tek 12-ta e lindjes së PS, 12-ta e 12 muajve për 4 vjet punë, punë, punë, rroftë Durrësi, Shqipëria, socialistë e demokratë.”
Vlonjatëve u kërkon 9 mandate
Në Vlorë Likja i doli i zbutur, të fliste për demokraci, festë demokracie të dielën, i kishte harruar sfurqet, sëpatat, kërcënimet, dhe ishte bërë goxha i matur. Tha se i kishte thënë Likes,të lërë rakinë, se ishte pjesa më e sukseshme e fjalimit në Vlorë.
Kur filloi atë seriozen, ishte i frikshëm. Vlorës, tha Edi Rama në përmbylljen e fushatës, i kthyen kurrizin për vite me radhë si të majtët, si të djathtët, dhe sot pas 8 viteve qeverisje ai kërkoi 9 mandate për të vijuar, sipas tij, transformimin e këtij qyteti, që i jep kuptim Shqipërisë.
“Kujdes me shënjestrën, se mos më shkoni tek 9, është me hile, ti thua 9, të bëhet 6, ti thua Luli, të de Monika. Ti thua 6, të del Iliri me Saliun e Lulin. Prandaj robi u mundua, dhe 69 është numri i djallit. Kush voton 6, kush voton 9, veten e Shqipërinë në djall e çon. Ne do bëjmë punë të mëdha, e të vogla. Ka dhe një punë, janë ato shërbimet, zyrat, prandaj tek shënjestra e 12-tës. Na jepni dhe 2-3 vjet kohë që sistemi i shërbimeve të futet tek celulari juaj, e mos keni nevojë t’ia shihni fytyrën asnjë zyrtari apo nëpunës,” tha Rama duke shtuar se mund të flas deri nesër në mëngjes, se ngado rrotullohesh këtu është fitore, fitore, fitore, fitore!
“Këtu është zemra e fitores. Duhet vetëm të më besojë se nga këtu unë mendoj, duke parë gjithë këtë rreth se nuk keni parë gjë akoma. Mos harroni, çfarë e pengoi Shqipërinë që atë dhuratë ta kthente në mirëqënie për veten e vet? Dora e mbrapshtë e robit, e të gjithë atyre që në histori janë e njëjta gjë, mallkim që na kthen nga pas, na ndjek përmes figurash që dalin nga brenda nesh, që bëjnë shumë më tepër dëm, se sa gjithë armiqtë bashkë, se asnjë armik s’ia bënte Shqipërisë atë që bëri Berisha me Rrapushin e Suden.
Atë që i bënë ça tithem unë atij President i Republikës? Atë që i bën burri Monikës. Udhëkryqi i 25 prillit është shumë i qartë, kush është i pakënaqur si unë, dhe ta kthejë energjinë në forcë të karakterit, dhe Shqipëria ngjitet në majën që zoti e deshi kur e krijoi. Kush e ka pakënaqësinë ta mundi dot, s’ka problem, por sot besoj se ju tani e ndiqni liken në kohë reale.
Sot Likja ishte zbutur, fliste për demokraci, festë demokracie të dielën, i harroi sfurqet, sëpatat, kërcënimet, dhe ishte bërë goxha i matur. Ja kam thënë Likes, lëre rakinë përpara se sa të ta nxjerrin të tjerët, se kur ta nxjerrin të tjerët ësht problem i madh. Like, dëgjoje, vajzën.
Vlora do e ndihmojë që të gjejë rrugën e shtëpisë. Keni për ta parë ju si gjithë ata trima që na tregojnë armët me leje e sfurqe, sëpata do bëhen lepuj siç i keni bërë ju kur keni vendosur të thoni fjalën tuaj. Vlora edhe Vlorën, fenë e kanë me zemër, ditën e kanë ditë, natën e kanë ëndërr,‘’ tha Rama në përmbyllje të fushatës në Vlorë duke përqeshur dhe akuzuar Liken dhe Saliun, ato që ishin dhe ngelën ushqim për elektoratin komunist.
