E konfirmoi Altin Dumani, Berisha: SPAK, mburojë e organizatës kriminale të Edi Ramës!

Duke e cilësuar Prokurorinë e Posaçme si seksion të PS, Kryetari i Partisë Demokratike, Sali Berisha tha se këtë e konfirmoi kreu i SPAK, Altin Dumani, një mburojë kjo e organizatës kriminale që organizohet nga Edi Rama.

“Jam sot para jush për t’ju deklaruar shqiptarëve se SKAP-i është një institucion kryekëput seksion i PS. Një mburojë e padepërtueshme e korrupsionit, vjedhjeve monstruoze të qeveritarëve shqiptarë. Të organizatës kriminale që organizohet nga Edi Rama.

Nuk kam patur asnjë, ua kam deklaruar shqiptarëve këtë në mënyrat më të përsëritura, natyrisht bazuar në fakte, në qendrime të pakundërshtueshme të këtij institucioni.

Por, këtë e konfirmoj në mënyrë përfundimtare. Deklarata e kreut të SKAP-it, Altin Dumani për 2 nga çështjet më tronditëse, më themelore të korrupsionit në Shqipëri, për problemin e Inceneratorëve dhe problemin e Uotërgejtin e shekullit të 21-të, problemin Rama-McGonigal.

Lidhur me problemin e Inceneratorëve, tragji-komedia e kësaj afere është e pakufijshme,” tha Sali Berisha duke shtuar se pretemndimi i Altin Dumanit se nuk dihen pronarët e inceneratorit të Tiranës, akuzon rëndë kreun e këtij institucioni dhe vetë SKAP-in, siç e quan kryetari i PD, Prokurorinë e Posaçme.

“Inceneratori i Tiranës, është një kontratë e cila u kushton shqiptarëve 420 milionë euro mbi bazën e firmave që janë vendosur në këtë kontratë. Inceneratori i Tiranës u shpall nga Altin Dumani, komisari politik i SKAP-it, si një sipërmarrje që nuk i dihen pronarët. Ky incenerator gllabëron çdo ditë si lubi qindra e mijëra euro të taksapaguesve shqiptarë nga një grup mafioz, i cili ka në krye Edi Ramën, Engjëll Agaçin, Erion Veliajn, dhe disa emra të tjerë.

Dy fjalë do t’i them z.komisar Dumanit se pretendimi juaj, se nuk dihen pronarët iu akuzon shumë rëndë ju dhe institucionin tuaj.

Së pari, le të marrim për të vërtetë atë që ju thoni, se nuk bllokoni dot fondet se nuk dihen pronarët. A mund t’ju thoni shqiptarëve: çfarë iu pengon ju zotëri, të dërgoni në gjykatë aferën, sepse ju paraqitët si pretekst pretendimin se janë arbitrazhet. Çdo arbitrazh është i detyruar të marrë parasysh vendimin e gjykatës së vendit.

Në afera të tjera është procedurë në këtë mënyrë, por ajo nuk ishte SKAP, ishte Prokuroria e Krimeve të Rënda. Ju nuk e dërgoni dot në gjykatë, sepse jeni në kontrollin dhe në mbështetjen e plotë të asaj bande që vjedh shqiptarët.

Së dyti, kontrata e Inceneratorit të Tiranës është e firmosur në shkeljen më flagrante të kodt civil të Shqipërisë. Nuk ka gjykatë që nuk rrëzon atë kontratë, për sa kohë në Shqipëri dhe kudo në botë, kodi civili është kushtetuta e kontratave. Ju nuk e bëni këtë, sepse ju jeni mburojë e qeveritarëve që kryejnë këtë vepër mafioze, këtë vjedhje të tmerrshme.”

Me këtë rast, Kryetari i Partisë Demokratike akuzoi Edi Raën dhe Engjëll Agaçin se shkelmuan strategjinë 4 milionë euro të Komisionit Europian për trajtimin e mbetjeve.

“Unë sot këtu dua të shtroj disa pyetje për shqiptarët. Kush është personi i cili shkelmoi strategjinë e hartuar me financimin e KE për trajtimin e mbetjeve për të cilin u shpenzuan 4 milionë euro, dhe e hodhën në kosh atë? Askush nuk mund ta bënte një gjë të tillë, përveç kryeministrit të Shqipërisë, i cili për krijimin e sipërmarrjes së djegësave, shkelmoi dhe hodhi në kosh strategjinë e trajtimit të mbetjeve, e trajtuar nga KE.
Cili autoritet mund të hidhte në kosh shkresat zyrtare të agjencisë publike të prukurimeve të firmosura nga drejtori, Edmond Ahmeti, se kontrata me negociata të mbyllura është antiligjore, dhe se nuk ekziston në legjislacionin e Shqipërisë. Një akt të tillë kriminal ka kryer Edi Rama dhe Engjëll Agaçi. Askush tjetër nuk mund të bënte një shkelje të tillë, por edhe kjo mbrohet dhe injorohet nga SKAP-i i partisë.

Cili është personi që kaloi 17 procedura në 24 orë, në mënyrë të rrufeshme për Inceneratorin e Elbasanit. Arben Ahmetaj thotë që: unë nuk mund ta lëvizja qeverinë. E vërteta është që qeverinë mund ta lëvizë vetëm një njeri, dhe ky quhet Edi Rama,” tha Kryetari i Partisë Demokratike, Sali Berisha, duke përfunduar:

“Ndaj edhe Dumani nuk i gjen dot pronarët fundorë të Inceneratorit të Tiranës.”