E Ngarkuara me Punë e SHBA vizitë në SPAK, takim me Dumanin dhe prokurorët e posaçëm
SHBA falënderoi SPAK për guximin dhe angazhimin në shkatërrimin e rrjeteve kriminale që kërcënojnë sigurinë e Shteteve të Bashkuara dhe të Shqipërisë, shprehet Ambasada e SHBA në Tiranë pas takimit që sot e Ngarkuara me Punë Nancy VanHorn zhvilloi me kreun e SPAK, Altin Dumani, dhe disa prej prokurorëve të përkushtuar që janë pjesë e këtij institucioni.
“Znj. VanHorn vlerësoi bashkëpunimin e SPAK në luftën e Shteteve të Bashkuara kundër krimit ndërkombëtar, trafikut të drogës dhe emigracionit të paligjshëm,” shprehet Ambasada e SHBA në Tiranë përmes rrjetit social Faceboopk duke përfunduar:
“Falënderoi Z. Dumani për guximin dhe angazhimin e SPAK në shkatërrimin e rrjeteve kriminale që kërcënojnë sigurinë e Shteteve të Bashkuara dhe të Shqipërisë.”
Në fund. Ambasada e SHBA në Tiranë rikujton fokusin e Administratës Trump për ndjekjen penale të anëtarëve të karteleve dhe organizatave kriminale që bashkëpunojnë me ta.
