E premte e zezë me 12 viktima, Berisha: Shteti, për qytetarët nuk ekziston!

Pas ditës së djeshme me bilanc lufte ku humbën jetën 12 persona, ka reaguar Kryetari i Partisë Demokratike, Sali Berisha, duke e cilësuar “e premte e zezë me 12 viktima” dënon me ashpërsinë më të madhe indiferencën kriminale të shtetit.

“Dënoj me ashpërsinë më të madhe indiferencën kriminale, për sigurinë në ujrat e vendit, që shprehet kudo dhe në të gjitha fushat, ndërsa dje ka patur edhe 8 viktima të tjera në ujra, rrugë, kabina elektrike etj.” shprehet Sali Berisha duke konstatuar:

“Shteti, për qytetarët nuk ekziston!”

Reagimi:

Një e premte e zezë me 12 viktima, si në një vend pa shtet.

Të dashur miq, dje ishte një ditë tragjike në ujrat shqiptare dhe jo vetëm në to. Në ujrat e liqenit të Banjës u mbutën Arben Zogu, 46 vjeç, me dy djemtë e tij, Rubensin Zogu, 19 vjeç dhe Estin Zogu 14 vjeç, si dhe kushëririn e tyre Melsi Zogu, 20 vjeç. Kjo tragjedi e madhe familjare, që ka tronditur thellë shoqerinë tonë ishte plotësisht e parandalueshme, në rast se do ushtroheshin përgjegjësitë shtetërore, për përdorimin e liqenit për qëllime turistike, plazhi dhe noti. Por shteti, për qytetarët nuk ekziston.

Duke shprehur ngushëllimet më të ndjera familjes dhe banorëve të Gramshit, për këtë tragjedi të rëndë familjare, dënoj me ashpërsinë më të madhe indiferencën kriminale, për sigurinë në ujrat e vendit, që shprehet kudo dhe në të gjitha fushat, ndërsa dje ka patur edhe 8 viktima të tjera në ujra, rrugë, kabina elektrike etj.