Ecuria e procesit zgjedhor, Celibashi: Sulmohet aplikacioni i KQZ!
Pas përmbledhjes së ecurisë së procesi i votimit, Kryetari i Komisionit Qendror të Zgjedhjeve, Ilirian Celibashi, e pranoi se aplikacioni i KQZ-së është sulmuar. Për rastet e pezullimit të votimit, ai tha se ishin raste sporadike të pezullimit të përkohshëm të votimit dhe aktualisht janë 144 qendra votimi që po vijojnë identifikimin në mënyrë manuale.
“144 qendra votimi që identifikimi po bëhet më mënyrë manuale. Prej këtyre informacioni përfundimtar është se 83 qendra votimi janë duke bërë këtë proces se nuk janë paraqitur operatorët. Pastaj pjesa tjetër është për faktin se ka pasur probleme me pajisjen. Në disa raste nuk ka pritur për të marrë këshillimet e duhura nga KQZ. Ka në raste sporadike pezullim të përkohshëm të votimit qoftë për çështje të identifikimit elektronik apo dhe konflikteve apo mungesë të anëtarëve të qendrave të votimit.
Kemi pasur sinjalizim që në shkollën Betim Muço ka pasur grumbullim njerëzish edhe në ambientet e brendshme të shkollës, dhe pse është e palejueshme përveç atyre që votojnë. Kemi dërguar inspektorë të KQZ dhe situata atje është qartësuar,” tha Celibashi ndërsa për pëqindjen e pjesëmarrjes ku u identifikua dhe një ngecje në rifreskimin e të dhënave, ai e pranoi se kishte një sulm kibernetik:
“Në lidhje me përqindjen e pjesëmarrjes, dua të sqaroj dy momente. Njëra është informacion. Aplikacioni i KQZ është sulmuar pak më parapara, por po punohet për zgjidhjen e situatës.”
Pas minuta pas daljes publike të Ilirian Celibashit ka filluar përditësimi i të dhënave dhe ende nuk është e qartë nëse ky aplikim ka marrë veten pas sulmit kibernetik.
