Edhe 13 raste, 1.399 të prekur me koronavirus në Maqedoninë e Veriut

Ministri i Shëndetësisë i Maqedonisë së Veriut, Venko Filipçe, duke përditësuar të dhënat tha se gjatë 24 orëve janë shënuar edhe 13 raste të reja, ndërsa janë shëruar 53, duke çuar numrin në 1.399 numrin e të prekurve me koronavirus ndërkohë numri i të shëruarve aktualisht është 553.

Gjatë 24 orëve të fundit janë testuar 289 persona, me të cilët numri i përgjithshëm i testeve të kryera ka arritur në 15,409.

Ministria e Shëndetësisë e Maqedonisë së Veriut njoftoi se edhe katër njerëz kanë humbur jetën nga koronavirusi në këtë vend. Me këtë shifër, numri i përgjithshëm i viktimave atje shkon në 65.

Viktimat e fundit janë: një grua 58 vjeçe nga Tetova, dy nga Kumanova të moshës 81 dhe 47 vjeç dhe një 66-vjeçar nga Manastiri.

Ndërkohë, Ministria e Shëndetësisë i kërkoi Qeverisë së Maqedonisë së Veriut që të miratojë vendimin për aplikimin e gjobave për të gjithë personat që nuk mbajnë maska në vende publike dhe të mbyllura.

Vendosja e maskave është bërë e detyrueshme me rekomandim të Shtabit të Krizës.

Në rast të shkeljes së vendimit, gjoba për personat fizikë do të jetë 20 euro, ndërsa për personat juridikë 2,000 euro.

Kërkesa e ministrisë vjen pas pamjeve të shfaqura nga qytete të ndryshme se si qytetarët nuk e respektojnë vendimin për mbajtjen e maskave në vende ku nuk mund të ketë distancë sociale.