Edhe 2 raste, 35 të prekur me koronavirus në Kosovë. Vjen ilaçi nga SHBA!

Instituti Kombëtar i Shëndetësisë Publike, IKSHPK, ka bërë ditur sot se janë zbuluar edhe dy raste duke e çuar në 35 numrin e personave të prekur me koronavirus në Kosovë. IKSHPK bën të ditur se njëri rast i konfirmuar është me vendbanim nga fshati Petrovë komuna e Shtimes, e gjinisë mashkull me moshë 44 vjeç dhe tjetra me vendbanim në Prishtinë nga komuna e Prishtinës e gjinisë femër e moshës 39 vjeç.

Ndërkohë Kosova ka nisur të furnizohet me dy ilaçet, hidroksidi i klorokuinit i kombinuar me antibiotikun azitromicin, të cilat javën e kaluar u aprovuan nga autoritetet amerikane për përdorim në luftimin e virusit COVID-19. Ministria e Shëndetësisë

“Ministria e Shëndetësisë ka siguruar një sasi nëpërmjet buxhetit të Shërbimit Spitalor dhe Klinik Universitar të Kosovës, kurse një pjesë e vogël është pranuar si donacion nga një operator i brendshëm ekonomik,” thekson kjo ministri duke bërë të ditur se ka porositur edhe sasi shtesë të dy ilaçeve, të cilat priten të vijnë nesër.

“Sasi tjera do të porositet nesër, të cilat do të mbulohen nga buxheti i Ministrisë së Shëndetësisë.”

Njoftimi

“Sot me 23.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar njëzet (20) mostra të dyshimta për virusin SARS-CoV-2 dhe dy (2) prej tyre janë pozitive.

Dy prej rasteve pozitive janë raste kontakti njëri me vendbanim nga fshati Petrovë komuna e Shtimes, e gjinisë mashkull me moshë 44 vjeç dhe tjetra me vendbanim në Prishtinë nga komuna e Prishtinës e gjinisë femër e moshës 39 vjeç.

Nga data 08.02.2020 deri me 23.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 604 mostra të dyshimta në virusin SARS-CoV-2 dhe prej tyre, gjithsej tridhjetë e pesë (35) raste kanë rezultuar pozitive”, thuhet në njoftim.

IKSHPK kërkon nga qytetarët të qëndrojnë në shtëpi dhe të mbajnë higjienën personale.