Edhe 305 të infektuar dhe 8 të vdekur nga koronavirusi në Serbi, Beogradi urdhëron karantinë për veriun e Kosovës

Brenda 24 orëve janë shënuar edhe 305 raste të reja, duke e çuar në 1.476 numrin e të prekurve me koronavirus. Ndërkohë Shtabi i Krizës duke përditësuar të dhënat se për 24 orë kanë vdekur 8 pacientë duke e çuar në 39 numrin e të vdekurve me koronavirus.

Për shkak të mosrespektimit të masave për parandalimin e përhapjes së koronavirusit, ministri i Brendshëm, Nebojsha Stefanoviç, e ka urdhëruar Drejtorin e Policisë, Vladimir Rebiç, se në të gjitha rrugët e Serbisë të nxjerr policinë, xhandarmërinë, njësitet speciale dhe policinë rrugore, në mënyrë që të kontrollojnë lëvizjen e njerëzve në rrugë.

Ndërkohë Veriu i Mitrovicës dhe Zveçani janë shpallur territore nën karantinë. Vendimi hyri në fuqi në orën 18:00, dhe këtë e ka bërë të ditur kryetari i komunës Mitrovicë Veri, Goran Rakiç, i cili saktësoi se karantina u vendos me propozimin e epidemiologëve, ekspertëve të Institutit të Shëndetit Publik dhe Shtabit të Krizës së Serbisë.

Goran Rakiç, njeriu që nxiti dhe mbanë nën tension veriun e Mitrovicës sot edhe një herë dëshmoi se kjo pjesë e Kosovës kontrollohet nga Serbia, dhe është Beogradi zyrtar që bënë ligjin pavarësisht se çfarë thotë Edi Rama dhe “vëllai i tij”, Aleksandar Vuçiç.

Sipas vendimit për karantinë, asnjë qytetar nuk lejohet të futet ose dalë nga kjo pjesë e Kosovës, përveç në rastet e nevojave mjekësore, prodhimit, tregtimit dhe furnizimit me ushqime.    Në Kosovë, në fuqi është ndalimi i lëvizjes nga ora 17:00 ndërkohë në pjesën veriore të Kosovës, raporton Televizioni Publik i Serbisë, RTS, dyqanet punojnë deri në orën 15:00 ndërsa nesër deri në orën 13:00, e më pas do të hapen vetëm të hënën në mëngjes, ka bërë të ditur kryetari i komunës Mitrovicë Veri, Goran Rakiç.