Edhe 78 raste, 13.673 të prekur me koronavirus në Maqedoninë e Veriut

Pas testimit të 860 personave të dyshuar gjatë 24 orëve të fundit 78 prej tyre kanë rezultuar pozitiv me COVID-19 duke e çuar në 13.673 numrin të prekurve me koronavirus në Maqedoninë e Veriut, shifër kjo më e ulta që nga 4 gushti kur ishin regjistruar 75 raste.

Ministria e Shëndetësisë sot ka raportuar për 4 qytetarë që kanë humbur betejën me koronavirusin ndërsa 40 pacientë janë shëruar në 24 orët është fundit

Viktimat janë dy nga Gostivari të moshës 71 dhe 82 vjeç, një nga Tetova i moshës 73 vjeç dhe nga tjetër nga Kumanova, 68 vjeç.

Sa i përket të infektuarve, 28 janë nga Shkupi ndërsa numër më i vogël se dhjetë është regjistruar në 16 qytete tjera.

Nga 138,325 teste të bëra që nga paraqitja e rastit të parë, me COVID-19, sëmundja që shkakton koronavirusi, janë diagnostikuar 13,673 raste, prej tyre 10,150 janë shëruar, 568 kanë vdekur ndërsa 2,995 ende janë aktivë.

Drejtuesit e institucioneve mjekësore kanë thënë se shifrat janë shpresëdhënëse dhe dëshmi se vendi ka kapacitet për përballje me pandeminë.

“Vetëm së bashku mund ta luftojmë pandeminë” COVID-19 me të cilën po përballemi me sukses. Institucionet po u përmbahen të gjitha protokolleve dhe rekomandimeve të përcaktuara për të mbrojtur shëndetin tonë dhe shëndetin e të gjithëve përreth nesh, por këtë duhet ta bëjë çdonjëri prej nesh. Ne mund të mos jemi të vetëdijshëm se jemi të infektuar, dhe të mbajmë maskën është mënyra më e thjeshtë për të parandaluar dhe përhapur virusin”, ka deklaruar Kosta Kapsarov, mjek në Klinikën Infektive në Shkup.

Për shkak të mosrespektimit të vendimit për mbajtjen e maskës, raporton RFE, Ministria e Punëve të Brendshme, në 24 orët e fundit ka shqiptuar 459 gjoba.