Edhe 8 raste, 79 të prekur me koronavirus në Kosovë
Ministri në detyrë i Shëndetësisë, Arben Vitia, ka bërë të ditur se janë zbuluar edhe 8 raste të reja duke e çuar kështu në 79 numrin e të prekurve me koronavirus në Kosovë.
“Sot në Laboratorin e Mikrobiologjisë Molekulare në IKSHPK me metodën RT-PCR, janë testuar 89 persona nga të cilet 8 kanë rezultuar pozitiv,” thekson Viti ndërsa jep dhe një lajm të mirë, se njëri nga pacientët edhe pas testimit të dytë ka dalur negativ.
“Sipas rekomandimeve të OBSh kur dy mostra negative të një personi me një ditē distancë kohore, tregojnë shërimin nga COVID-19. Zyrtarisht kemi personin e parë të shëruar nga COVID-19 në Republikën e Kosovës. Faleminderit personelit shëndetësor në Klinikën Infektive dhe të gjithë mantilbardhëve në institucionet shëndetësore në Kosovë,” thekson Ministri në detyrë i Shëndetësisë, Arben Vitia, në reagimin e tij përmes rrjetit social Facebook duke bërë thirrje sërish që të ndihmohet personeli shëndetësor .
Ndërkohë Instituti Kombëtar i Shëndetësisë Publike duke përditësuar të dhënat thekson se nga rastet e konfirmuara pozitive, katër janë raste kontakti në Studime të Ulët, Vushtrri; tri raste janë nga Prishtina dhe një rast është rast kontakti me vendbanim në Llugagji të Pejës.
IKShPK në të njëjtën kohë ka dhënë edhe numrin e përgjithshëm të testimeve të ndërmarra që nga 8 shkurti:
“Nga data 08.02.2020 deri me 26.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 855 mostra të dyshimta në virusin SARS-CoV-2 dhe prej tyre, gjithsej shtatëdhjetë e nëntë (79) raste kanë rezultuar pozitive, me një (1) rast të vdekjes i një të moshuari 82 vjeç,” thekson IKSHPK përmes njoftimit.
