Edhe 8 raste, shkon në 71 numri i të prekurve me koronavirus në Kosovë

Pas testimit të 34 personave brenda 24 orëve, Instituti i Shëndetit Publik, IKSHPK, ka bërë të ditur se 8 raste kanë rezultuat pozitiv, duke e çuar kështu në 71 numrin e të prekurve me koronavirus në Kosovë.

Rastet e konfirmuara pozitive janë raste kontakti prej të cilëve 4 raste janë me vendbanim në fshatin Domanek- Malishevë, tri raste me vendbanim në Prishtinë dhe një rast me vendbanim në fshatin Studime e ulët, Vushtrri.

Ndërkohë ministri i Shëndetësisë, Arben Vitia, ka bërë të ditur se njëri nga pacientët është drejt shërimit dhe tashmë njëri test ka rezultuar negativ dhe se janë në pritje të rezultatit përfundimtar.

“Sot me 25.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar tridhjetë e katër (34) mostra të marra të rasteve nga terreni dhe në Klinikën Infektive. Po vazhdon testimi i të gjithë kontakteve të identifikuara, të personave me COVID 19. Sot nga këto mostra tetë (8) prej prej tyre kanë rezultuar pozitive. Në ndërkohë kemi rezultatin e parë NEGATIV të njërit nga pcientët me CODID 19 pozitiv. Nevojitet edhe testi kontrollues dhe me shpresë që do të kemi pacientin e parë të shëruar me COVID 19 në Kosovë,” tha ministri Vitia duke bërë thirrje të ndihmohet personeli shëndetësor dhe qytetarët të qëndrojnë në shtëpi:

“Mbani distancë me njëri tjetrin për 2 metra! Na ndihmoni pak që t’ju ndihmojmë shumë!”

Dhe, derisa personeli mjekësor, Ministria e Shëndetësisë dhe Instituti i Shëndetit Publik vazhdojnë luftën kundër koronavirusit, Lidhja Demokratike e Kosovës ka inicuar mocionin për shkarkimin e qeverisë dhe me ndihmën e partisë së Thaçit dhe Haradinajt, duke mos përfillë rekomandimin e ISHKPK që e ndalonte këtë tubimin për mungesë të kushteve, po zhvillojnë seancën për largimin e Albin Kurtin.

Njoftimi

Nga data 08.02.2020 deri me 25.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 766 mostra të dyshimta në virusin SARS-CoV-2 dhe prej tyre, gjithsej 71 raste kanë rezultuar pozitive, me një rast të vdekjes i një të moshuari 82 vjeç.

Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për ve tizolim dhe të kërkojnë ndihmë mjekësore nëse kanë simptome.

Nga data 01.02.2020 deri me 25.03.2020 në Aeroportin ndërkombëtar “Adem Jashari” si dhe në pikat tokësore kufitare janë depistuar gjithsej 18.027 udhëtarë. Në Aeroportin “Adem Jashari” 1.015 udhëtarë, Merdare 5.306, Vërmicë 4.825, Jarinje 1.362, Dheu i Bardhë 1.010, Hani i Elezit 2.587, Kullë 1.151, Qafë Morinë 47, Bërnjak 521, Qafë Prush 35, Muçibabë 167 dhe Glloboçicë 1 udhëtarë