Edhe depozitat bien në nëntor

Nëntori nuk rezulton të ketë qenë shumë pozitiv për sistemin bankar, në një sinjal të hershëm që pasojat e tërmetit, që ra në ditët e fundit të këtij muaji mund të kenë ndikim në të ardhmen.

Përveç tkurrjes së kredisë, statistikat e Bankës së Shqipërisë tregojnë se dhe rritja e depozitave ka ngecur. Në fund të muajit nëntor, stoku i kursimeve të bizneseve dhe individëve ishte rreth 1 trilionë lekë, me një rënie të lehtë prej 575 milionë lekësh (-0.05%) në raport me muajin e mëparshëm.

Tkurrja ka ardhur nga kursimet në valutë, që ranë me 2.2% me bazë mujore, ndërsa ato në lekë vijuan rritjen 0.5% në raport me tetorin, të udhëhequra nga kursimet e individëve në depozitat pa afat.

Ndërsa rënia e kursimeve në valutë erdhi si rrjedhojë e uljes së depozitave të individëve.

Pavarësisht tendencës rënëse të kursimeve në valutë në nëntor, ato vijojnë të jenë dominonte, duke përbërë 54.7% të totalit në fund të muajit nëntor, nga 53.7% në të njëjtën periudhë të një viti më parë, duke shënuar një rritje me 1 pikë përqindje në një vit. Rënia e depozitave në lekë i ka bërë individët më pak të prirur të vendosin kursimet e tyre në banka. Që prej shtatorit të vitit 2011, kur Banka e Shqipërisë ndërmori politikën lehtësuese monetare, interesat e depozitave në lekë kanë zbritur vazhdimisht, duke qenë sot më pak se 1% për afatet 12 mujore. Në të kundërt, edhe pse kthimi nga kursimet në valutë është pothuajse zero, kursimet në valutë kanë vijuar rritjen.

Me bazë vjetore (nëntor 2019/nëntor 2018), depozitat në total janë rritur me 3.8%. efektin më të lartë në këtë tendencë e kanë shënuar kursimet në valutë, të cilat kanë ndikuar në 80% të rritjes.

Edhe kredia në rënie të lehtë

Sipas statistikave të publikuara sot nga banka e Shqipërisë, stoku i huasë për ekonominë ishte 568 miliardë lekë në fund të muajit nëntor, me një rënie të lehtë prej 329 milionë lekësh në krahasim me muajin e mëparshëm.

Kjo rënie ka ardhur si rrjedhojë e tkurrjes së huasë në valutë për korporatat, që ka rënë me 0.75%, ose me 1.5 miliardë lekë në raport me muajin e mëparshëm. Ndërsa kredia për individë ka vijuar tendencën rritëse, me 0.35% në raport me muajin e mëparshëm, si në lekë ashtu dhe në valutë.

Gjatë këtij viti, huadhënia për ekonominë ishte rigjallëruar pas disa vitesh në stanjacion. Me bazë vjetore, (nëntor 2019/nëntor 2018), kredia për ekonominë është rritur me 6.3%, e ndikuar si nga leku ashtu dhe nga valuta./Monitor/