Edhe Edi Reja filloi të gënjej, Grezda: S’kam marrë ftesë!

Pasi trajneri i kombëtares Edi Reja u shpreh se i vjen keq për Eros Grezdën sepse ishte një lojtar me potencial të madh por ai nuk pranoi disa situata që u krijuan në grupin tonë, dhe vendosi të mos pranojë ftesën tonë, reagon vetë Grezda duke e bërë të qartë se s’ka marrë asnjë ftesë dhe se do të jetë gjithmonë i gatshëm të përfaqësojë dhe mbroj ngjyrat kuq e zi.

“Kemi krijuar një ekuilibër në këtë skuadër, që na lejon të kemi shumë opsione. Unë dua që lojtarët që vijnë këtu të jenë të qetë pavarësisht luajnë apo nuk luajnë. Kjo është një detyrë e trajnerit, për të vendosur se kush do luajë apo jo. Kemi një grup solid.

Nëse përmendim rastin e Eros Grezdës, më vjen shumë keq sepse ishte një lojtar me potencial të madh, por ai nuk pranoi disa situata që u krijuan në grupin tonë dhe vendosi të mos pranojë ftesën tonë më mbrapa. Mbi të gjitha është Shqipëria dhe kush mendon se është Mesi, për të nuk ka vend në fushë. Rëndësi ka grupi dhe pastaj ka individi.” tha Edi Reja në konferencë  për shtyp.

Por, lojtari kuqezi me anë të një statusi në rrjetet sociale, tregon se nuk i është bërë ftesë për dy ndeshjet e fundit që kuqezinjtë do të luajnë.

“Për korrektësi dhe për informimin e saktë të gjithë tifozëve, më duhet të sqaroj polemikat e krijuara rreth emrit tim.

Për grumbullimin e tanishëm për dy ndeshjet e radhës, unë s’kam marrë asnjë ftesë zyrtare ose ndonjë telefonatë nga federata apo trajner i Kombëtares.

Sa më përket mua personalisht, kam qenë, jam dhe do të jem gjithmonë i gatshëm të përfaqësojë popullin tim dhe të mbroj ngjyrat kuq zi”.