Edhe një incident me rrjedhje të amoniakut në Serbi

Mbrëmjen e së enjtes, në Topolë afër Pançevës ka pasur rrjedhje të amoniakut nga një autobot, raportojnë mediat shtetërore serbe.

Një person është dërguar në spitalin e Pançevës dhe është trajtuar me oksigjeno-terapi.

Radio Televizioni i Serbisë, RTS, tha se zjarrfikësit dhe policia kanë dalë në vendin e ngjarjes dhe banorët e dhjetëra shtëpive pranë vendit ku ndodhi incidenti janë evakuuar.

Ministria e Punëve të Brendshme të Serbisë ende nuk është deklaruar për këtë incident.

Mediat lokale në Serbi kanë raportuar se ky incident nuk paraqet rrezik të madh për banorët.

Në fund të dhjetorit , katër nga 20 vagonë që po transportonin amoniak, dolën nga shinat afër Pirotit.

Pas aksidentit, raporton RFE, mbi 50 persona u hospitalizuan me simptoma të helmimit.

Më 26 dhjetor, një ditë pas aksidentit, ministri serb i Transportit, Goran Vesiç, tha se aksidenti u shkaktua për shkak të infrastrukturës së dobët.