Edhe një sulm kibernetik në Shqipëri, goditet sistemi TIMS, Rama: Të njëjtët agresorë!

Shqipëria goditet sërish nga një sulm kibernetik. Lajmin e ka bërë të ditur Kryeministri Edi Rama, duke saktësuar se nëhet fjalë për të njëjtin agresorë, Irani, ndërsa po punohet me aleatët për t’i bërë të papenetrueshme sistemet digjitale shqiptare.

“Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS,” bënë të ditur Edi Rama përmes rrjetit social Twitter duke përfunduar:

“Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale.”

Ndërkohë Ministria e Brendshme jep detajet rreth këtij sulmi kibernetik që për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht ndërsa bënë të ditur se shumë shpejt sistemi TIMS do të rikthehet në punë.

“Mbrëmjen e kaluar sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik. Nga të dhënat paraprake rezulton që sulmi të jetë kryer nga e njëjta dorë. Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacënueshmërinë e të dhënave dhe më pas neutralizimin e këtij akti kriminal. Për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht,” thekson Ministria e Brendshme në sqarimin e saj duke përfunduar:

“Shumë shpejt sistemi TIMS do të rikthehet në punë. Maksimalisht të vendosur, bashkë me aleatët tanë, vazhdojmë punën për të bërë gjithçka duhet që sistemet tona digjitale të jenë të sigurta dhe shërbimi ndaj qytetarëve të mos ndërpritet në asnjë rast.”