Edhe pa Marrëveshje, Glauk Konjufca kryetar i Parlamentit të Kosovës
Pas konstituimit të legjislaturës së shtatë të Parlamentit të Kosovës dhe betimit të 111 deputetëve nga 120 sa janë gjithsej, ndonëse nuk u arritë Marrëveshja për koalicionin qeverisës LVV-LDK, me 75 vota për, 27 kundër dhe 6 abstenime, Kryetar i Parlamentit u zgjodh kandidati nga radhët e Lëvizjes Vetëvendosje, Glauk Konjufca.
Ndërsa me 104 vota për, 1 kundër dhe 3 abstenime, Nënkryetarë të Parlamentit të Kosovës u zgjodhën, Arbërie Nagavci nga LVV, Kujtim Shala nga LDK, dhe Memli Krasniqi nga PDK.
Nënkryetarë të Parlamentit të Kosovës nga radhët e komuniteteve janë zgjedhur Sllavko Simiç dhe Fikrim Damka.
Pas konstituimit të Parlamentit tashmë Presidenti i Kosovës pritet të nisë bisedimet me partinë fituese të zgjedhjeve për caktimin e të mandatuarit për formimin e qeverisë.
Pas mandatit të dhënë nga Presidenti i Republikës, kandidati për Kryeministër që dihet se do të jetë Albin Kurti nga Vetëvendosje, ka në dispozicion 15 ditë që t’ia ofrojë Parlamentit përbërjen e kabinetit qeverisës. Në rast se herën e parë dështon, Presidenti bazuar në Kushtetutë ka të drejtë që të mandatojë një kandidat tjetër. Nëse edhe i dyti dështon që të marrë votat e nevojshme në Parlament, vendi shkon në zgjedhje të parakohshme.
Ndryshe, përkundër skepticizmit pas deklaratës së Kryetarit të Lidhjes Demokratike të Kosovës, Isa Mustafa, se në mungesë të një Marrëveshje me Lëvizjen Vetëvendosje, LDK do ta votojë qeverinë por të ngelet në opozitë, zgjedhja e Kryetarit të Parlamentit, Glauk Konjufca, nga radhët e Lëvizjes Vetëvendosje me votat e LDK, dëshmoi se partia e Mustafës do të vazhdoj jetën parlamentare në opozitë.
