Edhe Parisi kundër ndryshimit të kufijve, rikujton parimet e Badinterit

Edhe Parisi shprehet për çështjen aktuale të korrigjimiti të kufijve midis Kosovës e Serbisë.

Franca, ashtu sikur se Gjermania, është kundër ndryshimit të kufijve ndërmjet këtyre dy vendeve ballkanike.

E përditshmja serbe “Veçernje Novosti” citon burime sipas të cilave në Konferencën me ambasadorët e Francës, të mbajtur javën e kaluar, në të cilën ishte i pranishëm edhe presidenti francez, Emanuel Macron, u tha qartë se ky vend është kundër çfarëdo ndryshimi të kufijve në rajon. Në lidhje me këtë çështje, qëndrimi i Parisit madje është edhe më i prerë se ai i Berlinit.

“Parisi zyrtar druan se çfarëdo “rivizatimi” kufijsh do të mund të shkaktonte reaksione zinxhir në rajon, madje edhe nëse do të theksohej se kjo ka të bëjë vetëm me marrëdhëniet midis Beogradit e Prishtinës”, raportohet të jetë thënë nga autoritetet franceze, thekso Koha.net.

Kjo, në radhë të parë ka të bëjë me situatën sipas të cilës Republika Srpska (BeH) do të provonte shembullin e veriut të Kosovës. Francezët u përmbahen me rigorozitet parimeve të Badinterit sipas të cilave kufijtë e republikave brenda ish-Jugosllavisë (sipas Kushtetutës së vitit 1974) të shpallen kufij të shteteve.

Sipas gazetës serbe, marrëveshja për Kosovën do të marrë formën përfundimtare pikërisht në Francë, në kulisat e kremtimit të 100-vjetorit të ngadhënjimit të aleatëve në Luftën e Parë Botërore, më 11 e 12 nëntor në Paris.

Raundi i ri i bisedimeve të Brukselit në nivelin e presidenteve, midis Hashim Thaçit të Kosovës, dhe Aleksandar Vuçiqit të Serbisë, me ndërmjetësimin e kryediplomates së BE-së, Federice Mogherini, është paralajmëruar të mbahet këtë të premte, më 7 shtator.