Edhe pse sot skadon afati dhe nuk ka ankesa, KQZ: Nesër shpallen rezultatet!

Edhe nëse sot nuk ka ankesa në PZAP lidhur me administrimin e numërimit në Qendrën e Numërimit dhe Rezultateve, dhe kalon afati prej 24 orëve, duke pasur parasysh se të martën rreth mesnatës është përmbyllur procesi i numërimit të fletëvotimeve, Komisioni Qendror i Zgjedhjeve, KQZ, do t’i shpallë rezultatet përfundimtare gjatë ditës enjte.

Këtë e ka bërë të ditur sot Zëdhënësi i KQZ-së, Valmir Elezi, sipas të cilit Komisioni Qendror i Zgjedhjeve do të veprojë në përputhje me ligjin për zgjedhjet e përgjithshme lidhur me shpalljen e rezultateve përfundimtare.

“Ligji për zgjedhjet e përgjithshme e lejon mundësinë që të bëhet ankesë brenda 24 orëve në PZAP lidhur me administrimin e numërimit në Qendrën e Numërimit dhe Rezultateve. Prandaj, duke e ditur se të martën rreth mesnatës është përmbyllur procesi i numërimit të fletëvotimeve sipas vendimit të Gjykatës Supreme, KQZ-ja është e obliguar që të respektojë këtë afat ligjor.”

KQZ, tha Elezi, do të komunikojë me institucionet përkatëse për të marrë konfirmim se nuk kanë ndonjë çështje në shqyrtim dhe pastaj do të mund të shpallë rezultatet përfundimtare të këtyre zgjedhjeve.

“Nëse nuk do të ketë ankesa brenda këtij afati, Komisioni Qendror i Zgjedhjeve do t’i shpallë rezultatet përfundimtare gjatë ditës enjte.”