Edi Rama akuzoi Opozitën/ Kriza politike, Basha: Zgjidhja e vetme, largimi i qeverisë dhe zgjedhje të lira e të ndershme!

Pasi Kryeministri Edi Rama akuzoi sot opozitën si fajtore për vitin e vështirë që po lëmë pas, Kryetari i Partisë Demokratike, Lulzim Basha, kishte një mesazh të qartë për akuzuesin Rama ndërsa e porositi që të hapë veshët dhe të dëgjojë mirë se largimi i kësaj qeverie dhe hapja e rrugës për zgjedhje të lira e të ndershme është ilaçi për këtë krizë të thellë politike që është arsyeja e krizës ekonomike dhe krizës sociale.

“Fajin e ka opozita, fajin e ka media, fajin e ka Macron, fajin e ka Franca, fajin e ka Europa, fajin e ka Amerika! Kur është në pushtet Obama, fajin e ka Trump, kur është në pushtet Trump, fajin e ka kundërshtari i Trump! Fajin e kanë të gjithë, vetëm Edi Rama s’ka faj! E vetmja përgjigje që kam për këtë, është që të hapë veshët dhe të dëgjojë mirë, se nga Shkodra deri në Vlorë, nga Tirana në Korçë, mesazhi është i qartë: Largimi i kësaj qeverie dhe hapja e rrugës për zgjedhje të lira e të ndershme është ilaçi për këtë krizë të thellë politike që është arsyeja e krizës ekonomike dhe krizës sociale,” tha Lulzim Basha duke shtuar se kjo krizë politike, themelin e ka tek kapja e gjithë pushteteve, te babëzia për pushtet dhe për para e Edi Ramës dhe bandës së tij.

Pas takimit me përfaqësuesit e Fondit Monetar Ndërkombëtar, FMN, në Ëashington dhe për rajonin në Vjenë ku është diskutuar kriza e tmerrshme ekonomike në të cilën e ka zhytur vendin kjo qeveri me dështimet e saj, lideri i opozitës tha se një ndër problemet kryesore është dhe mbetet çështja e qindra milionë dollarëve të cilat në vend që të shkojnë për rritjen e pagave e pensioneve, apo për investime publike, përfundojnë në duart e 13 oligarkëve.

”Në qoftë se buxheti që kanë planifikuar do të kalojë, përbën një vjedhje, një makutëri të babëzitur, një vjedhje të hapur të qindra milionë dollarëve, 146 milion dollarë që planifikohen t’u jepen 13 njerëzve për PPP-ra e konçensione,” tha Basha duke shtuar se kjo do të çojë në thellimin e krizës, sepse jo vetëm vendi nuk ka mundësi t’i paguajë këto, qytetarët nuk kanë më mundësi t’i paguajnë, por do të çojë edhe në një rritje të mëtejshme të borxhit publik.

“Rruga për daljen nga kjo krizë është e qartë. Lajmi i vetëm i mirë që ndava me FMN-në, është që opozita e bashkuar dhe Partia Demokratike me ndihmën e partnerëve perëndimore, kanë një plan të qartë për ta ndalur këtë krizë ekonomike dhe për ta nxjerrë vendin nga kjo krizë ekonomike.

1.Me planin tonë ekonomik, një pjesë e të cilit ka filluar të shpaloset edhe gjatë “Rrugëtimit tim për Shqipërinë”, ne do t’ia dalim, në radhë të parë, të ndalim menjëherë këto koncensione korruptive, të rikthejmë paratë e destinuara për 13 oligarkët, 13 kontratat korruptive, tek qytetarët, tek universitetet, tek studentët, tek fermerët, tek biznesi i vogël.

2.Së dyti do të arrijmë t’i kthejmë kushtet e përgjithshme ligjore, në veçanti të barazisë para ligjit, të konkurencës, të tregut të lirë dhe jo të monopoleve. Dhe kushtet e favorshme për biznes, duke eleminuar dhjetëra qindra barriera të hapura, të fshehura, kurthe, gropa, që i hapin biznesit nga mëngjesi deri në darkë, duke eleminuar bandat e inspektorëve tatimorë që i terrorizojnë nga mëngjesi deri në darkë.

3.Një plan pra që do të mundësojë që biznesi, nesër, qeverinë ta ketë në krah duke e ndihmuar, dhe jo siç e ka sot, si kërcënimin kryesor dhe shqetësimin kryesor, që nga mëngjesi kur zgjohen për të shkuar në punë e deri në mbrëmje, kur mbyllin aktivitetin e tyre të biznesit, shqetësimi dhe ankthi i tyre kryesor është: çfarë proçke do na bëjë sot qeveria! Çfarë presioni do të kemi sot nga tatimorët, nga inspektorët! Sa gjoba duhet të paguajmë sot, drejtëpërdrejtë apo si ryshfet, për të vazhduar për të mbijetuar.”

Kjo situatë nuk mund të vazhdojë më kështu dhe nuk ka më pse të jetë kështu.

Me planin tonë, me vizionin tonë për nesër dhe me ndihmën e partnerëve tanë ndërkombëtarë, ne do t’i japim fund kësaj situate, tha Kryetari i Partisë Demokratike, duke bërë të ditur se do të vënë nën kontroll borxhin publik që ka dalë totalisht jashtë kontrolli dhe do të orientojmë të gjitha paratë e shqiptarëve drejt dy drejtimeve kryesore:

“1.Përmirësimit të fuqisë blerëse të shqiptarëve përmes pagës minimale prej 300 eurosh. Përmes rritjes së pensioneve vit për vit. Pra fuqizimit të fuqisë blerëse të shqiptarëve, që do të thotë cilësi më e mirë jete për shqiptarët. Përmes mbështetjes së politikave sociale dhe politikave të zhvillimit, siç janë politikat tona për arsimin e lartë, në veçanti arsimit profesional dhe politikat për mbështetjen e më të pamundurve.

2.Blloku i dytë ka të bëjë me investimet publike që ndihmojnë ekonominë. Jo fasada, jo buzëkuq elektoral, por investime që ndihmojnë ekonominë, investime që kryhen me koston reale dhe jo me kosto kriminale siç janë ato 300 milion eurove për 17 kilometra rrugë në konçensionin e fundit të babëzisë, të Milot –Balldren.”

Këmbanat kanë rënë, por e rëndësishme është të kuptohet që, përtej konstatimeve të FMN-së, përtej konstatimeve tona prej shumë vitesh tashmë, që kjo rrugë e vjedhjes dhe grabitjes të pasurive publike, vjedhjes së shqiptarëve, vetëm këtu do të çonte, tani ka ardhur koha, tha Kryetari I Partisë Demokratike, Lulzim Basha, për një reagim gjithëpopullor për ta ndalur këtë ndërsa përfundon: “E vetmja mënyrë për ta ndalur është që për të hapur vende pune, duhet të mbyllim disa vende pune. Duhet të nxjerrim nga vendet e punës, që i kanë okupuar me të padrejtë kreun e qeverisë dhe ministrat e tij të paaftë, të dështuar dhe të korruptuar.”