Edi Rama: Armiku më i madh i policisë nuk është krimi, por…

Në 107-vjetorin e Policisë së Shtetit, ku u përurua reparti i ri i Forcave Speciale RENEA, Kryeministri Edi Rama tha se armiku më i madh i policisë nuk është krimi, por vetmia, që lind nga mbështetja e mbështetjes dhe mungesa e vëmendjes për ta dëgjuar ndërsa shprehu kënaqësinë që qeveria të cilën ai e drejton ky armik është asgjësuar.

“Armiku më i madh i policisë nuk është krimi, por vetmia, që lind nga mbështetja e mbështetjes, nga shtypja dhe mungesa e vëmendjes për ta dëgjuar. Më vjen shumë mirë, që me qeverinë që unë drejtoj, ky armik është asgjësuar. Ne nuk kemi bërë sa kemi dashur, por sa kemi mundur. Kemi bërë gjithçka që policia sot të ketë më pak nevoja seç kishte dje. Nuk kemi bërë sa kemi dashur për shpërblimin e forcave të policisë, por kemi bërë gjithçka dhe sot policia është shumë herë më e paguar se dje. Nuk kemi bërë gjithçka për kushtet, por kemi bërë gjithçka kemi mundur, dhe do vazhdojmë të bëjmë gjithçka.

Me përurimin e repartit të forcave RENEA, Kryeministri u zotua për kujdesin që gjithë fëmijët e punonjësve të Policisë së Shtetit do të kenë:

“Vetë RENEA-s, historia e së cilës nis me një ndërhyrje në emergjencë civile më 1991, pas një përmbytjeje shumë të furishme, ku një efektivë i kohës rrezikoi jetën, u hodh në ujin e akullt dhe shpëtoi tre barinj në rrezik mbytjeje. Është një histori që ka shënuar shumë akte të tilla. Ne kemi bërë gjithçka kemi mundur për ta dhe do vazhdojmë të bëjmë gjithçka, në mënyrë që gjitha të mirat që shoqëria, shteti, kombi, ka parë nga këto forca, të shtohen dhe gjithnjë e më shumë mirësi nga shteti të kenë të gjithë ata që shërbejnë me uniformë, së bashku me familjet e tyre. Do kujdesemi që gjithë fëmijët e punonjësve të Policisë së Shtetit të kenë një të ardhme më të mirë.”

Kryeministri Edi Rama zbuloi me këtë  rast tre objektivat kryesore që do të ketë në vijim për Policinë e Shtetit: kthimi i Akademisë së Sigurisë në një strukturë moderne në rajon, kthimi i Repartit të FNSH në model dhe laboratori shkencor për uniformat blu.

 “Akademia e Sigurisë do të kthehet në një strukturë model në rajon, në çdo aspekt, Reparti i FNSH do jetë një tjetër model, dhe laboratori shkencor është një tjetër domosdoshmëri alarmante për ta sofistikuar Policinë e Shtetit, në kushtet kur krimi sofistikohet çdo ditë. Për këto tre objektiva puna fillon sot.”

Suksesi i policisë dhe KÇK

Ndonëse raportet e shumëta flasin për pushtetin e krimit në Shqipëri, Kryeministri Edi Rama vlerësoi se viti që lamë pas ishte domethënës për policinë. “Një vit i komplikuar dhe i pakrahasueshëm me asnjë vit tjetër gjatë të cilit gjithë treguesit kryesorë njohën rënie. Është për të ardhur keq që në atmosferën e rëndëuar artificialisht nga disa drejtime dhe në kushtet e një xhungle informacioni krijohet përshtypja e gabuar mbi situatën e kriminialitetit në Shqipëri.

Ky raport në gjithë këto vite ka ardhur duke rritur forcën e shtetit dhe duke ulur forcën e krimit. Vitin e shkuar u shpërbënë më shumë se dyfishi i grupeve kriminale, u shumëfishuan asetet e sekuestruara vetëm në 2019. U rrit ndjeshëm forca goditëse ndaj të gjithë veprave të rënda apo më pak të rënda penale. U aplikuan për herë të parë metoda të reja kundër krimit përfshi edhe krimin kibernetik, dhe siç evidenton progres raporti u rrit niveli i sigurisë dhe të drejtave të njeriut.”

Nuk është e qartë se në cilën sekondë të protestave përgjatë 6 muajve e pa, por sot Edi Rama foli për një polici profesionale dhe proporcionale në raport me protestën ndonëse la pas bulevarde, dyqane dhe qendra biznesi të komtaminuara me atë që Ish-Gjeneral Sandër Lleshaj e quan gaz lotësjellës:

“Falë Policisë jo vetëm u sigurua rendi dhe qetësia gjatë 6 muajve marramandes të opozitës por u shfaq në sytë e opinionit publik vendas ftytyra e një policie shteti profesionale dhe proporcionale në raport me protestën përtej gjithë vështirësisë së jashtëzakonshme ku u vu policia e shtetit. Nuk ka pikë diskutimi se krahasuar me të nesërmen dita e sotme nuk mjafton.”

2020, tha Kryeministri, është përcaktuar si një vit kyç për të vënë në jetë ofensivën më shembullore ndaj krimit të organizuar ndërsa për sundimin e krimit të organizuar gjeti dhe fajtorin: KÇK! “Me përparimin e reformës në drejtësi po bëhet një përparim i madh rrënjësor në pallatin e drejtësisë. Por koha e nevojshme për të vënë në funksion të plotë institucionet e reja të drejtësisë nuk është fort e shkurtër dhe në këtë fazë tranzicioni shoqëria jonë po përballet me një organizatë kriminale brenda sistemit të drejtësisë, e rrezikshme e kriminale e përbërë nga prokurorë e gjykatës që nuk e kalojnë dot vettingun e i janë bashkuar motos KÇK duke dhënë vendime skandaloze e në cënim të sigurisë kombëtare për këtë ne kemi ndërmarrë nismën e një pakete ligjore duke e kolauduar edhe me BE dhe në ditët në vijim do ta kthejmë në një bazë ligjore për të ndërmarrë ofensivën më shembullore ndaj krimit të organizuar, ndaj të gjithë atyre që janë dënuar, janë akuzuar por i kanë shpëtuar dënimit si rezultat i KÇK dhe ka ardhur koha të provojnë se pasuria e tyre nuk buron nga krimi ose përndryshe të dorëzojnë pasurinë e tyre. dhe paralelisht do vemë me shpatulla pas muri cdo anëtar të KÇK që do marrë vendime në kundërshtim me ligjin,” tha Kryeministri Edi Rama duke përfunduar:

“Policia ka nisur një process pastrimi, ose sic do thoshte Ismail Qemali ‘qerimi nga radhët e veta të atyre që nuk janë të denjë për të’ përmes një vetting që po ecën me të gjithë kujdesin e nevojshëm e vendosmërine e dosmodoshme.”