Edi Rama dhe Comfortably Numb
nga Agim Popoci
“E vetmja keqardhje që kam është se do ishte më mirë të na thonin se ‘ju duam brenda familjes, por janë disa rregulla, që nuk janë ende gati’, pasi krijohet një situatë pak e çuditshme, pasi qytetarët në Shqipëri i besojnë këta zyrtarë evropianë, dhe mendojnë se është politika e brendshme problem.” Kështu shprehet Edi Rama në Forumin Ekonomik të Shkupit ndërkohë që Komisioneri Shtetëror, Ilirjan Celibashi kishte certifkuar rezultatin e zgjedhjeve të 25 Prillit, ndonëse nuk përkonin me realitetin për të cilin fliste Kryeministri i tij!
Nëse qytetarët në Shqipëri u besojnë zyrtarëve evropianë dhe mendojnë se është politika e brendshme problem, siç thotë Edi Rama, atëherë ata nuk e kanë votuar Partinë Socialiste edhe pse ndryshe tha KAS, Kolegji Zgjedhor, dhe Ilirjan Celibashi i cili e shpalli fitues duke i dhënë 74 mandate.
Nëse qytetarët në Shqipëri u besojnë zyrtarëve evropianë dhe mendojnë se është politika e brendshme problem, siç thotë Edi Rama, atëherë blerja e votës nga Partia Socialiste nuk është më thashethem, dhe nuk ka arsye të pritet si zakonisht OSBE/ODIHR ti jap vulën zgjedhjeve, e në këtë rast edhe blerjes së votës.
Nëse qytetarët në Shqipëri u besojnë zyrtarëve evropianë dhe mendojnë se është politika e brendshme problem, siç thotë Edi Rama, kujt i fletë Kryeministri Rama për fajtorët dhe dështuesit, Bashkimin Europian apo Shqipërinë. Situata nuk është aspak e çuditshme por i çuditshëm është vetë ai i cili nga viti 1992 është në politikë dhe që nga dita e parë, njerëzit, atyre që mendon t’u marrë votën, i trajton si kafshë.
A është kjo strategji apo gjurmë që mund të ketë lënë komunizmi dhe privilegjet që kishte në diktaturë, në këtë lloj formimi, prindi i tij deputet Kristaq Rama apo Barba Pilo?!
Të analizosh sjelljen e një çuni blloku sot Kryeministër në ditën kur Pink Floyd feston 41 vjetorin e këngës së papërsëritshme “Comfortably Numb”, nuk është dhe aq e lehtë! Këtë këngë të fundit, dyshja Roger Waters dhe David Gilmour e krijuan për njerëz normal, dhe Edi Rama në atë kohë si 16 vjeçar mund ta gëzonte edhe këtë privilegj ndonëse nuk ishte pjesë e normalitetit për të cilin krijonte Pink Floyd.
Gjithsesi, e dëgjoi ose jo “Comfortably Numb” Edi Rama pak rëndësi ka, por ai u rritë gjasme me rrjedhën e kësaj bote ndërsa gëzoi nga ana tjetër privilegje pa fund edhe pse në diktaturë, me të gjitha ato që u vetëquajt, artist, basketbollist, pedagog, antikomunist, piktor, ministër kulture, kryebashkiak, kryesocialist dhe së fundi kryeministër, duke mbajtur mbi supe gjatë gjithë kohës dhe titullin e “çunit rebel” edhe pse nuk e arsyetoi për asnjë moment!
Pse shkoi pedagogu Edi Rama të bëhet Kryetari i PD me rastin e themelimit të saj dhe kërkonte varjen e komunistëve, nuk e kuptoi njeri, ndonëse e shikonin si çunin që kishte dëgjuar “Comfortably Numb”, në veçanti ata që i kishin shkëputur me dhunë nga kultura botërore dhe koren e bukës e shikonin si mikrofon.
Pse hëngri dru Edi Rama për shkrimet e tij, vetëm “Comfortably Numb” nuk ka faj, ama e ardhmja e tij në politikë dhe veprimet e bashkëpartiakve të tij treguan se kush është ajo parti që jep dhe shet dru ndër shqiptarë për mendimin ndryshe!
Pse shqiptarët i dhanë votën avokatit Spartak Ngjela dhe jo Kryetarit të Bashkisë Tiranë, Edi Rama, që punoi aq shumë me sopatë në dorë, kryebashkiaku nuk dha kurrë përgjigje edhe pse bëhej fjalë për dy çuna blloku që kanë dëgjuar “Comfortably Numb”, ama mandatin e gëzoi jo ai që kishte më shumë vota por atë që shpalli fitues Ilirjan Celibashi!
Pse ndërhynë serbët që Edi Rama të bëhet Kryeministër për momentin nuk ishte e qartë edhe pse shkuesinë e bëri një President serb i cili poashtu kishte shijuar “Comfortably Numb”. Por, me kalimin e ditëve, realizimi i ëndrrës komuniste nga viti 1946 për bashkim me Serbinë sqaroi shumë gjëra, jo vetëm Marrëveshjen kriminale të 1 Prillit 2013 në Shkodër. Edi Rama “u zgjodh” edhe dy herë të tjera Kryeministër dhe rrëzimi i tij tashmë nuk është çështje kohe!
Pse sot shqiptarët u besojnë zyrtarëve evropianë dhe jo Kryeministrit që “i dhanë votën”, këtu vetëm BE nuk ka lidhje pavarësisht atyre që nxjerr nga goja Kryeministri i Shqipërisë Edi Rama dhe shkelmon gjithë mikrofonat që i dalin para; Po, Ilirjan Celibashin vazhdon ta ketë në shërbim, por sa vlenë kjo!
Sot, të papërsëritshmen “Comfortably Numb” e shijojnë të gjitha gjeneratat shqiptare, si ato që i internoi dhe keqtrajtoi Kristaqi dhe Barba Pilo me shokë, ashtu dhe ato që i keqtrajtoi dhe i detyroi të largohen nga Shqipëria, Edi Rama me patronazhistët e tij, ama pushtetin e Kryeministrit Rama nuk po e shijon njeri; Ndonëse duhet pranuar se pushteti i Edi Ramës u bë i papërsëritshëm!
A do të mbetet në Shqipëri njeri për ta kujtuar 41 vjetorin e mandatit të tij të tretë, kjo mbetet për tu parë, por bazuar në trendin e emigrimit, rrezik do të mungoj edhe Zaho; E për tu dëgjuar, me siguri se do të kujtohet me shumë dashuri në 82 vjetorin e saj si sot, e shkëlqyera këngë e Pink Floyd, “Comfortably Numb”…
