Edi Rama do ti dëboj nga Zyra/ Reagimi, Antikomunistët e Përndjekur: Boll i keni lyer duart me gjakun tonë!
Edi Rama përmes Ministrisë së Drejtësisë sërish ka urdhëruar dëbimin nga selia, Shoqatën Antikomuniste e të Përndjekurve Politikë të Shqipërisë duke kërcënuar kështu funksionimin dhe vazhdimësinë e punës së kësaj Shoqate.
Në reagimin e tyre, të përndjekurit politikë antikomunistë theksoj se kjo përpjekje e përsëritur e Ministrisë se Drejtësisë për ti dëbuar nga zyrat, është një sulm i pastër politik i qeverisë që lidhet me qëndrimet dhe aktivitetin politik, e që në shumë raste shkon kundër qëndrimit armiqësor të kësaj qeverie me të përndjekurit politikë antikomunistë, idealet dhe interesat e tyre.
“Urdhri i përsëritur për dëbimin nga selia e Shoqatës Antikomuniste e të Përndjekurve Politikë të Shqipërisë është shprehje e qartë e politikës së luftës së klasave të trashëguar nga etërit te bijtë në linjë politike, juridike e gjenetike që po zbatohet nga qeveria aktuale e bijve me të njëjtën urrejtje si etërit e tyre gjakatarë.”
Ndërkohë që qeveria vazhdon politikën e luftës së klasave dhe represionin ndaj kundërshtarëve politikë të diktaturës komuniste, Antikomunistët e Përndjekur Politikë theksojnë se janë të vendosur të përballen me të gjitha mjetet, në mbrojtje të idealeve, interesave dhe ekzistencës së tyre politike, juridike e fizike.
“Në këtë situatë i bëjmë thirrje kryeministrit Edi Rama dhe Ministres Etilda Gjoni të heqin dorë nga lufta e klasave dhe represioni politikë ndaj të Përndjekurve Politikë Antikomunistë. Boll i keni lyer duart me gjakun tonë. Ne ju garantojmë se ashtu si përballë etërve tuaj do të përballemi edhe me ju edhe me politikat tuaja kriminale të dëbim-internimeve të demonstruara hapur nën urdhrin e Ministrisë së Drejtësisë,” theksojnë Antikomunistët e Përndjekur Politikë në reagimin e tyre të firmosur nga kryetari Nebil Çika dhe drejtuar krerëve të shtetit shqiptar si dhe kreut të opozitës Lulzim Basha.
Ndryshe, në mungesë të një reflektimi institucional, Shoqata Antikomuniste e të Përndjekurve Politikë të Shqipërisë, për çdo situatë i drejtohet anëtarëve të saj:
“I bëjmë thirrje të gjithë të Përndjekurve Politikë Antikomunistë të përgatiten për një përballje me të gjitha mjetet e mënyrat me represionin që qeveria po ushtron për arsye politike, në mënyrë të drejtpërdrejtë e të hapur, me shtresën tonë.”
Reagimi i Shoqatës Antikomuniste e të Përndjekurve Politikë të Shqipërisë
