“Edi Rama gati për negociata”/ Nga foltorja Parlamentit, Kryeministri: S’ka negociata. S’ka zgjedhje të parakohshme!

Pasi baltosi deri në lodhje “Opozitën e Edi Ramës”, nga foltorja e Parlamentit të Shqipërisë, Kryeministri e bëri të qartë se është gati për negociata. Si gjithmonë kur është i prerë se nuk do ta bëjë një gjë, Edi Rama është i gatshëm ta bëjë pikërisht atë gjë, dhe këtë e ka konfirmuar nga viti 2000 kur u bë kryetari I Bashkisë së Tiranës e deri  më sot.    

Në fjalimin e tij plotë urrejtje dhe përçmim, Edi Rama tha se nuk do të pranojë asnjë lloj ndërmjetësimi apo tentativë për tryeze me PD dhe LSI-në për të negociuar lidhur me kërkesat e tyre madje e quajti si detyrë historike të Partisë Socialiste, mbylljen njëherë e mirë kapitullin e negocimit të pushtetit në tavolinë.

“Ata mund të kenë akoma shpresë që këtu mund të vijnë nga qielli negociatorë dhe do të na ulin në tavolinë dhe do të na thonë: Hë tani djema si do ta normalizoni këtë punë?

Ka vetëm një normalizim të mundshëm, të nevojshëm, të domosdoshëm. Mbyllja e kapitullit 30 vjet,” unë po iki po s’më thirre”. “Unë s’rri, po s’më dhe atë që dua.” Ky kapitull do të mbyllet tani. Çdo parti politike, kur vjen në Kuvend si opozitë, duhet ta mendojë mirë, se nuk ka xinxri-finxri, “e dua pushtetin të nesërmen e betimit” , “dua zgjedhje të parakohshme, etj.” Këto mund të bëhen për propagandë, por me metoda kërcënimi, me metoda shantazhimi mund të dëmtojnë çeljen e negociatave, ata po e dëmtojnë çeljen e negociatave, ekonominë, edhe imazhin e Shqipërisë. Është përgjegjësia e tyre, turpin ta mbajnë vetë.

PS e ka mision historik të mbyllë sot këto kapitull të gjatë, jo po ulemi, jo po negociojmë, jo po të vijë mediatori, jo po të vijë ambasadori. Nuk ka më të tilla. Ka Kushtetutë, ka mandat,” tha Edi Rama, njeriu që nuk njeh as Kushtetutën, as mandatin dhe as ligjin, por blenë vota, shkarkon dhe emëron prokuror dhe gjyqtarë në mënyrë të paligjshme në emër të vettingut, merr sopatën për të hequr shtyllën nga rruga, çob policinë Bashkiake për ti mbrojtur mikut të tij komunist, arreston rivalët politik dhe tërheq zvarrë deputetët opozitar edhe kur ata janë profesor të nderuar të Shqipërisë, dhe jo vetëm, në emër të rendit dhe qetësisë publike. Abuzues i papërmirësueshëm!

Dhe, në kulmin e protestave, kur nuk ka qytetarë që është i kënaqur me qeverisjen e tij, madje as ata që i shkojnë me dhunë në mitingje, ndërkohë që ka orët e numëruara të pushtetit të tij primitiv, hakërrehet ndaj opozitës se i ka mundur dhe do ti mund prapë:

“Ne nuk e kemi marrë mandatin për ta negociuar përpara 2021. Ka apo s’ka zgjedhje të parakohshme këtë s’mund ta përcaktojë kurrë shantazhi dhe kërcënimi dhe asnjë lloj negocimi.

Zero. Kjo është pjesë e mënyrës se si veprohen me strategjitë e brendshme. Kjo është vetëm vullnet i njëanshëm i PS, vetëm në rast se gjykojmë ne dhe jo për shkak të tyre. Ju kemi mundur. Do t’ju mundim prapë, do t’ju mundim më thellë. Jepni Shqipërisë një mundësi që të ketë një imazh tjetër se ato dy sigla ne do t’i çojmë për skrap.”