Edi Rama i dorëzon Presidentit emrin e kreut të ri të SHISH! Kurti e Osmani e shkarkuan nga AKI!
Ndonëse në rrjetet sociale e publikoi si propozim që i paraqiti Presidentit të Republikës për emërimin e Vlora Hysenit si drejtore e Shërbimit Informativ Kombëtar, fotoja që e shoqëroi këtë “propozim” tregon se Bajram Begaj i kishte bërë aminin pa e hapur gojën fare shefi i tij, Kryeministri Edi Rama.
Dhe, jo vetëm kaq! Në vitin e 10 të qeverisjes ky njeri duke parë ëndërra me SHIK-un e Gazidedes, nuk e dinë që ky institucion quhet SHISH, Shërbimi Informativ i Shtetit!
Dhe, në krye të institucionit më të rëndësishëm të sigurisë së vendit, ky njeri që tallet me shtetin nga dita e parë që shkeli në Kryeministri, propozoi një njeri i cili ishte shkarkuar nga kreu i Agjensisë Kosovare të Inteligjencës me vendim të Presidentes së Kosovës, Vjosa Osmani, dhe propozim të Kryeministrit Albin Kurti, dhe sot nuk dihet se kujt mund ti shërbej përveç se Serbisë!
“Sot i paraqita Presidentit të Republikës propozimin për emërimin e Znj.VLORA HYSENI drejtore e Shërbimit Informativ Kombëtar,” shprehet Kryeministri Edi Rama përmes rjetit social Facebook duke përfunduar:
“Me besimin e plotë se përgatitja e spikatur, eksperienca e krijuar në vite dhe respekti që zonja Hyseni gëzon në komunitetin ndërkombëtar të inteligjencës, përbëjnë një garanci të plotë për reformimin e mëtejshëm të shërbimit inteligjent shqiptar.”
Përveç denigrimit të Presidentit të Republikës, që Kryeministri Edi Rama e ka specialitet dhe kështu veproi me të tre Presidentët që punoi, Rama vazhdoi edhe me denigrimin e kosovarëve.
“Vendimi për shkarkim e obligon znj. Vlora Hyseni të bëjë dorëzimin e të gjitha mjeteve dhe materialeve me të cilat ka qenë e ngarkuar. Gjithashtu, znj. Vlora Hyseni, sipas vendimit, obligohet që të ruajë të gjitha informacionet që ka marrë gjatë ushtrimit të detyrës, pavarësisht sesi i është dhënë qasja në to apo si i ka pranuar ato, apo në çfarëdo forme tjetër ka arritur të posedoj informacione të klasifikuara,” thuhej në njoftimin zyrtar nga Presidenca e Kosovës për shkarkimin e zonjës Hyseni nga kreu i AKI-së, dhe mjaftoi fakti që ajo mbulonte marrëdhëniet e Kosovës me Serbinë në AKI, që Edi Rama ta punësoj menjëherë si Këshilltare në Kryeministri!
Kujt do ti shërbejë në Shqipëri, Vlora Hyseni, dhe për çfarë respekti në komunitetin ndërkombëtar të inteligjencës flet Edi Rama kur në emërimin ose shkarkimin e njeriut të parë të AKI, Kryeministri dhe Presidenti i Kosovës konsultohen detyrimisht me NATO dhe Shtetet e Bashkuara!
Apo, ndoshta kjo lëvizje ishte e domosdoshme meqë shumë projekte kanë ngecur si me Ballkanin e Hapur ashtu dhe Batonin e Devollët, që ndihen të kërcënuar në Tiranën jo vetëm me spiunë serbë!
