Edi Rama ka zënë pajagë!
nga Agim Popoci
Jo se e ndihmoi Lulin ta bëjë Këshillin Kombëtar, jo se i mbushi Pallatin e Kongreseve për Kuvendin Kombëtar, jo se nuk reagoi për radikalët islamik të armatosur që thuhet se janë në selinë e PD, jo se nuk e çau kokën ashtu sikur se Luli për patronazhistët, jo se shpërfilli krimin me inceneratorët, as që shpërbleu shqiptarët me fodullëk për listën e pagave që u publikuan, jo se po vjen Sali Berisha me uraganin e tij më 8 Janar, por Edi Rama pas tetë vjet qeverisjeje pa opozitë, duhet të ikë sepse ka zënë pajagë.
Ashtu sikurse rrushi në të butë, Edi Rama ka zënë pajagë, u tha, nga propaganda që e prodhoi vetë, u prish nga ministrat dhe Lali Eri që i shpiku, dhe sot ndryshku nuk i hiqet dot!
Nuk i hiqet sepse u prish në të butë, e teproi Kunati me moratoriumin e mosreagimeve opozitare, dhe sot Edi Rama nuk prodhon dot më as propagandë; Kjo është dhe arsyeja që shqetësohet kur Berisha i cakton datën Lulzim Bashës se deri kur është kryetar i PD, nuk bie rehat kur Taulant Balla e thotë që PS nuk e do Sali Berishën për kryetar të demokratëve dhe i kërkon Kunatit që selia e tij e shenjtë të kërkoj hetime nga SPAK, për atë që pa dashje e riktheu në politikë, Doktorin.
Ndërsa 8 Janari po afrohet, Kryeministrin nuk e zë gjumi, dhe poston për 15 orë dy herë një lajm për të thënë se qytetarët e Laçit që mbetën pa kulm mbi kokë nga tërmeti, do të vendosen sot në shtëpitë e reja!
Ja që u vendosën, morën dhe çelësat ata dhe shumë të tjerë, por në zgjedhjet vendore të vitit 2019 dëshmuan se Kurbini nuk e voton Edi Ramën pavarësisht se cilin rezultat e pagëzon Celibashi, dhe i dolën vetëm 7.909 votues ose 13.87%.
Bëri dhe sondazhe pas zgjedhjeve, dhe përkundër shpikjes që bëri me dhuratën turke për katolikët shqiptarë, Laçi nuk e shiti heroin kombëtar Skënderbeu për një kulm të ri mbi kokë.
Dhe, i vjen një haber nga Sali Berisha pavarësisht lojën që socialistët po bëjnë me SPAK-un kundër tij. Butësisht, thotë, se do ta largoj Lulzim Bashën nga zyra e tij më 8 Janar, por nga një gjë e butë Edi Rama tashmë e ka të qartë se Partia e tij Socialiste zuri ndryshk dhe më 9 Janar fillon rënien e lirë.
Nuk i ndihmon dot as mallkimi socialist për Galileon dhe kullën e Pizës, sepse është vonë, shumë vonë, dhe tani ai me Kunatin duhet të mendoj se ku ti çoj më 9 Janar plaçkat e Lulit dhe sejmenëve të tij ndonëse rënia e lirë edhe në këtë rast është njëtrajtësisht e ndryshuar dhe nxitimi është 9.8 m/s²; Çfarë të bëjë me kompanitë që do të menaxhojnë reklamat kur Komisioni për Rithemelimin e Partisë Demokratike nuk ka Kunat, dhe në fund çfarë të bëjë me Parlamentin e Shqipërisë nëse deputetët aktual të PD i binden elektoratit dhe fillojnë të mendojnë për Partinë Demokratike!
Shumë pikëpyetje për Edi Ramën vetëm me një vendim të anëtarësisë së Partisë Demokratike duke mos përfillur Lulzim Bashën, dhe shumë sfida për Partinë Socialiste në një terren politik, ku pas tetë vitesh, më nuk i hap dot rrugë Basha as me fadromat dhe as me lekët e Kastratit.
Aktualisht nuk dihet se kur merr fund rënia e lirë e Partisë Socialiste e cila fillon më 9 Janar 2022, por Edi Rama tashmë e ka të qartë dhe me ndihmën e Galileot se pavarësisht nga pesha, shtëpitë ose dhe aeroportet e ndërtuara, të gjithë liderët lëvizin me të njëjtin nxitim te rënia e lirë, pjesë e së cilës tashmë është ai vet me partinë e tij kriminale.
Pse e lejoi rënien e lirë sot Edi Rama nuk ka arsye ta lodhë trurin ndonëse bashkëpunëtorët e tij thonë që e ka të qartë se zuri pajagë jo vetëm nga i buti që i garantoi Kunati për tetë vjet por nuk respektoi as ligjet e natyrës, dhe lejoi që Lulzim Basha të zërë pajagë duke u majur edhe pse ishte lider i opozitës!
E duke qenë njohës i mirë i traditës shqiptare ndonëse nuk e respekton, Edi Rama e din se pyka nxirret me pykë po aq sa e dinë që pajaga nuk hiqet me pajagë, dhe e vetmja gjë që e favorizon në këtë katrahurë politike është fakti se ka luksin ta shoh se si do të përfundoj më 8 Janar rrushi i Kunatit që ka zënë pajagë, për të kuptuar dhe fatin e vetë, i cili varet nga e njëjta dorë!
