Edi Rama kërkon të dënojë 2/3 e diasporës, Berisha: Pa amendimin e PD, s’votojmë ndryshimet në Kod!

Duke argumentuar tmerrin që ka përfshirë Kryeministrin Edi Rama nga vota e diasporës, Kryetari i Partisë Demokratike, Sali Berisha, akuzoi Kryetarin e Partisë Socialiste se po kërkon të dënojë të paktën dy të tretat e shqiptarëve që ndodhen jashtë vendit, duke mos i lejuar të votojnë me dokumentet biometrike të vendeve ku jetojnë. Kjo tha nuk do të lejohet, madje paralajmëroi se PD nuk do të votoj ndryshimet në Kodin Zgjedhor nëse motohet votimi me këtë dokument nga ana e PS-së!

Për aq shumë të përfolurën, Listë e Mbyllur, lideri demokrat sqaroi se do të përcaktohet nga gara, nga primaret dhe rezultati në primare.

Konferencën e përjavshme sot Kryetari i Partisë Demokratike e filloi duke bërë të ditur se PD ka paraqitur amendimin për njohjen e çdo dokumenti biometrik të vendit ku jetojnë emigrantët.

“Sot jam këtu për një problem themelor të këtij procesi zgjedhor. Për herë të parë në 34 vite, emigracionit dhe diasporës shqiptare, me ligj dhe vendime të Gjykatës Kushtetuese, iu dha mundësia të votojë, të ushtrojë të drejtën e tij kushtetuese.
Natyrisht ushtrimi i kësaj të drejte nga të gjitha vendet e botës ku ndodhen shqiptarët, nuk mund të ishte një proces i përsosur, por sot në epokën dixhitale, ky është një proces plotësisht i mundshëm.
Arritëm të përcaktojmë rregulla të pranueshme nga të dy palët, në mënyrë që të mos kontrollohet procesi nga njëra palë. Procesi i regjistrimit dhe votimit të diasporës.
Në këtë proces, qytetarët tanë jashtë vendit hasin vështirësi reale. Vështirësi, të cilat diktohen nga kërkesat e vendosura sidomos për adresën, në mënyrë që të mos ketë abuzime. Vetë procesi i aplikimit kalon në disa etapa. Ne e vëzhgojmë atë në çdo aspekt.

Tani, meqenëse Edi Rama dështoi të vendosë kontrollin e tij edhe mbi këtë proces online, ai po përdor metoda të tjera absolutisht të dënueshme, antikushtetuese, për ta kontrolluar procesin.
Në funksion të këtij procesi, KQZ ka kërkuar që të lëvizen datat e paraqitjes së partive, koalicioneve, kandidatëve, dhe ne, ndonëse nuk kemi bindje se është një diçka e domosdoshme, por përsëri për t’i dhënë një hapësirë dhe mundësi për qëndrimin më të madh në këtë proces, kemi shprehur gatishmërinë tonë të angazhohemi në ndryshimet ligjore të nevojshme që kërkohen për këtë proces.
KQZ ka propozuar gjithashtu një praktikë që është ndjekur në të gjitha zgjedhjet e tjera, përveçse në Himarë, se e refuzoi se donte ta merrte me çdo kusht me Vangjel Tavon, një tradhtar edhe i shqiptarëve, edhe i grekëve, por edhe besnik i mafies së Edi Ramës,” tha Sali Berisha duke sqaruar se KQZ kërkoi të shtyhet afati i dokumenteve shqiptare dhe kjo ka ndodhur edhe në zgjedhjet e tjera.

“Ky është një akt periodik që del sa herë vijnë zgjedhjet dhe kjo është normale. Por tani, për arsye të mbrapshta, duke parë urrejtjen që ka shpërthyer ndaj Edi Ramës dhe PS në diasporë, Edi Rama kërkon të dënojë, sipas llogarive tona, të paktën dy të tretat e shqiptarëve që ndodhen jashtë vendit, të cilët janë të sistemuar në këto vende dhe disponojnë dokumentet biometrike të vendeve ku jetojnë.
E vërteta është se dokumentet shqiptare i disponojnë më së shumti ata që nuk janë legalizuar në vendet ku jetojnë dhe për këta ka statistika. Këta janë më pak se një e treta.
Ne kemi përgatitur amendamentin dhe ne kërkojmë me ligj që këtyre t’u njihet çdo dokument biometrik i vendit ku jetojnë. Qoftë letërnjoftim, qoftë pasaportë.
Jashtë kësaj kërkese, ne nuk mund të pranojmë kurrë të përjashtojmë dy të tretat e emigrantëve dhe diasporës tonë nga votimi.
Ne mendojmë se ky është një akt i pashembullt, një diskrimin që nuk ka asnjë lloj baze.
Ka vetëm një kriter themelor që duhet të respektojë çdo qytetar që duhet të ushtrojë të drejtën e votës, shtetësia shqiptare.
Të gjitha të tjerat pastaj, duhet përgjigjur, por nuk duhet të jetë kurrë letërnjoftimi shqiptar, më epror se letërnjoftimi amerikan, kanadez, gjerman, belg, etj.
Pra, duke paraqitur një pretendim të tillë, Edi Rama dëshmon frikën e tmerrshme që ka nga vota e emigracionit dhe diasporës për shkak të alergjisë që kanë shprehur këta qytetarë ndaj narkoregjimit të Edi Ramës,” tha lideri i opozitës duke paralajmëruar se Mosbindjen Civile do e vazhdojnë në botë, nëse 1 milion shqiptarë në diasporë do mbeten pa votuar.

“Pra, ne e bëmë edhe kompromisin, por meqenëse u kërkua dhe në sensin që të bëjmë ndryshime me lëshime reciproke, kjo nuk duhet të jetë fare lëshim se nuk mund të ketë forcë politike që të pranojë të ndëshkojë dy të tretat e shqiptarëve se nuk kanë letërnjoftimet shqiptare apo pasaportat në xhep.
Në këtë kontekst, unë ftoj edhe njëherë, në radhë të parë KQZ që të bëjë demarshet zyrtare dhe të shprehet publikisht sepse zbatimi i vendimit të Gjykatës Kushtetuese është një detyrim madhor kushtetues.
Përndryshe, ne do organizojmë demonstratat më të fuqishme pranë ambasadave të narkoshtetit, por jo vetëm pranë ambasadave.
Pra, do të nisë një lëvizje e re e fuqishme e mosbindjes civile, kjo që është në Shqipëri, do vazhdojë në botë.
Nuk mund të pajtohemi kurrë me një frikë dhe absurditet që tregon regjimi ndaj votës së emigracionit.
Kjo do të thotë të përjashtohesh të paktën 1 milionë shqiptarë nga e drejta e votës.
Sepse është bërë shumë e qartë, Eurostati thotë 1.1 milionë shqiptarë nga viti 2014 deri në vitin 2022. Prej tyre, nja 200 e ca mijë janë të palegalizuar. Të tjerët janë ose bashkim familjar, ose të legalizuar. Pra, dy të tretat ose më shumë janë se duan t’i përjashtojnë në këtë mënyrë.
Unë nuk them se të gjithë këta nuk kanë dokumente, por në tërësi nuk kanë dokumente.
Dhe nga të katër anët e vendit njoftohemi se ne nuk po regjistrohemi dot për shkak të dokumenteve.
Edhe njëherë u bëj thirrje të gjithë emigrantëve dhe diasporës, të përgatiten për protestat më të fuqishme para selive të ambasadave që përfaqësojnë narkoshtetin, i cili kërkon t’i dënojë ata dhe de facto t’ua mohojë të drejtën e votës.
Përbën kjo një shkelje shumë të rëndë, shumë të madhe, përjashtimi i 1 milion shqiptarëve vetëm se nuk kanë dokument shqiptar, është i padëgjuar ndonjëherë.

Berisha e bëri të qartë se nuk do të ketë votim të ndryshimeve në Kodin Zgjedhor nëse nuk votohen dy amendamentet e Partisë Demokratike.

“Asnjë votim nuk bëhet për këtë çështje në parlament, në rast se u mohohet, nëse parlamenti nuk pranon, por sanksionon praktikën e mohimit të 2/3 të shqiptarëve të drejtën për të votuar, as bëhet fjalë që ne nuk pranojmë kurrë këtë. Është jashtë çdo lloj mundësie ta pranojmë këtë.

Ne po dërgojmë ligjin në parlament, ne kemi dorëzuar ose duhet ta kenë dorëzuar ligjin në parlament, i cili sanksionon njohjen e dokumenteve biometrike të gjithë shqiptarëve që kanë shtetësi shqiptare. Përkundrazi, praktika tjetër është ndëshkuese për shumicën e shqiptarëve. Njëri vëlla që ka një letër njoftim shqiptar voton, vëllai tjetër nuk voton. Një çift burri që nuk e ka nuk voton, gruaja që e ka ruajtur diku, voton. Kjo është marrëzi, është e turpshme të dëgjohet.
Po a duhet të ketë dokument biometrik, plotësisht dakord. Pa dokument biometrik, ose shqiptar ose të huaja, sepse edhe shqiptarët këtu votojnë me dokument biometrik. Pra janë në kushte të barabarta,” tha Kryetari i Partisë Demokratike duke e akuzuar Partinq Socialiste si minuese të procesit.

“Minuese e procesit është PS-ja, që i lejon vetes të marrë një vendim të tillë, absurd, përjashtues për 1 milionë shqiptarë. Se këtu bëhet fjalë për 1 mln shqiptarë. Kjo tregon se këta e nisën për tu tallur këtë proces. Çfarë detyrimi kanë ata pasi marrin dokumentet biometrike të vendit ku jetojnë, të mbajnë dokumente shqiptare. Asnjë detyrim nuk kanë ata.

Me dokument biometrik kryen çdo lloj veprimi dhe i njihet edhe në Shqipëri, hyn, del. Ky veprim që bën Edi Rama, dëshmon tmerrin e tij nga emigracioni dhe diaspora, kjo është e vërteta. Do të përballet me aktivitet të jashtëzakonshëm, se ne do të mbrojmë të drejtën e qytetarëve. Nuk mund të pajtohemi ne që të përjashtojnë me një të rënë të lapsit 1 mln shqiptarë. Kurrë!”

Në fund, Kryetari i Partisë Demokratike foli dhe për Listën e Mbyllur që do të përcaktohet me Primare, ku edhe Diaspora do të ketë përfaqësuesit e vet.

“Unë ftoj të gjithë demokratet, demokratët dhe të gjithë ata që duan të marrin pjesë në garën e Primareve. Të fillojnë që sot garën për votën e Diasporës. Dmth, të fillojnë që sot regjistrimin e numrit më të madh të mundshëm të qytetarëve me të drejtë vote në emigracion dhe Diasporë. Do të jetë dhe ky një kontribut i tyre i madh dhe që padiskutim do të marrë vlerësimin e duhur,” tha Kryetari i Partisë Demokratike, Sali Berisha, duke sqaruar dhe numrin e deputetëve demokratë që do të jenë në parlament nga Diaspora:

“Do të ketë përfshirje nga diaspora, por statuti është mungestarë në këtë drejtim se është miratuar para se të zbatohet kjo praktikë. Sigurisht statuti në rastin e ardhshëm do të pësojë ndryshimet e duhura edhe për këtë problem. Sikurndër statuti do të japë përgjigje edhe për kuotimin e votave të diasporës për deputetët. Pra ka një seri problemesh për tu përgjigjur statuti i partisë për këtë formë votimi. Tani që tani ajo që mund të them është se, diaspora do të përfshihet.”