Edi Rama në sulm kundër ndëshkimit korrupsionit, Berisha: Ne kemi vetëm një rrugë, Protestat!

Për herë të parë në 32 vite, Edi Rama kalon në sulm të hapur kundër ndëshkimit të korrupsionit, tha Kryetari i Partisë Demokratike, Sali Berisha, para Kryesisë së PD-së duke e pranuar tashmë se opozitës nuk i ka mbetur rrugë tjetërv përveç protestave dhe paralajmëroi protestë kombëtare më 22 dhjetor dhe protesta në vijim gjer në krijimin e qeverisë teknike

“Zhvillimet e 10 ditëve të fundit janë zhvillime të paprecedentë në shumë e shumë vite.
Por plotësisht të pritshme.
Për herë të parë në 32 vite, kreu i qeverisë kalon në sulm të hapur kundër ndëshkimit të korrupsionit.
Në rastin në të cilin ai vetë ka ndarë paratë.

Akti i tillë është ndër më të pashembullt, nuk them se është më i pashembullti në botë, se bota ka autokratë dhe Edi Rama nuk është i vetmi, por në një vend që aspiron, se i lirë nuk është Shqipëria, por që aspiron integrimin europian, kjo nuk ka ndodhur dhe nuk mund të ndodhë kurrë.
Në qoftë se lexoni arsyetimin e shumicës dje, është identik, fjalë për fjalë, mishëron në një deklaratat e kryeavokatit Edi Rama, sepse ata vendosin pezullimin e pezullimit.
Sepse ata marrin përsipër anulimin e procesit ligjor të animimit në shkallët e tjera të procesit gjyqësor.
Sepse ata morën të mirëqenë pretendimin e Edi Ramës se qeveria paralizohet nga pezullimi i Lubisë.
Nuk ka absurditet më absolut se sa ky.
Qeveria nuk pezullohet as me një zëvendëskryeministër, as me tre, as me pesë ministra.
Këshilli i Ministrave vendos me shumicë.
Dhe këto pretendime të Edi Ramës janë pretendimet e një njeriu që është kapur duke vjedhur dhe do të mbrojë paratë e tij.
Pra, shuhet çdo shpresë se nëpërmjet pushtetit gjyqësor mund të luftohet realisht korrupsioni.
Se cila është situata sot me situatën në vitin 2011, unë iu rikujtoj ju dhe çdo shqiptari, në vitin 2011, një zëvendëskryeministër, i cili po të largonte ministrat nga qeveria, e rrëzonte qeverinë, jo që nuk mendoi në asnjë rast pasi u akuzua me një video të manipuluar 28 herë se ai kishte marrë ryshfet 760 mijë euro, çka ishte absolutisht gënjeshtër, sepse shkresa thoshte se sipërmarrësi, për shkak të moszbatimit të vendimit të Gjykatës së Apelit, unë kam humbur 760 mijë euro.
Dhe Edi Rama dhe Filip Çakulli i paraqitën këto si 760 mijë euro të marra nga Ilir Meta.
Por Ilir Meta, për standardet e asaj qeveria, pa kërkuar fare prokuroria heqjen e mandatit, ka ardhur dhe ka paraqitur dorëheqjen.
Unë nuk shkoj në prokurori si zëvendëskryeministër, ai që do më hetojë mua, do më ketë mua qytetar si gjithë të tjerët. Të njëjtin akt ka bërë Fatmir Mediu. Ka dhënë dorëheqje si ministër, ka dorëzuar imunitetin.
Në të gjithë periudhën 32-vjeçare, njeriu i vetëm që ka bllokuar hetimet për drogë dhe korrupsion, është Edi Rama.
Kërkoi antimafia italiane për Saimir Tahirin heqjen e imunitetin dhe arrestimin, nuk lejoi asnjërën.
Tani është një me Belinda Ballukun.
Është një me Belinda Balluku dhe triumfoi në çdo gjë që diktoi gjatë këtyre tre javëve.
Gjë më absurde nuk mund të kishte.
Të pretendohet se pezullimi i Ballukut shkel Kushtetutën apo paralizon qeverinë, problemi është se pezullimi i Ballukut çelte portën e ferrit për Edi Ramën, se ai ka vjedhur më shumë se Balluku në atë aferë.
Se ai, në të gjitha dosjet, është shumë më rëndë se Balluku,” tha Sali Berisha duke shtuar se ju ka mbetur vetëm një rrugë dhe ajo është rruga e protestave, të gjitha rrugët e tjera janë rrugë zjarrfikësish.

“Kështu që shpresa se do luftohet korrupsioni nga drejtësia e re, kjo është e para ministre në detyrë që akuzohet për korrupsion. Asnjë nuk ka qenë, kjo po.
Dhe urdhëroni se çfarë bëri para shqiptarëve, ky është një poshtërim për çdo shqiptar.
Ky u thotë shqiptarëve se unë vjedh, ministrat e mi vjedhin, por ata nuk mund të gjykohen.
Për shkak të tij, dy ditë më parë, u zhvillua ofensiva diplomatike më e madhe që kam parë ndonjëherë për të siguruar zgjedhjen e kryetarit të Prokurorisë Speciale, çka të bën me të drejtë të mendosh se Edi Rama duket se kishte bërë gjithçka të zgjidhte njeriun që ai ka bërë marrëveshje për mbylljen e dosjes së tij.
Sepse e vërteta është se Dumani mbylli disa dosje të Edi Ramës, kjo është e pamohueshme.
Dumani mbylli dosjen e Edi Ramës, duke akuzuar Arben Ahmetajn për djegësin e Tiranës, të cilin ai e kishte kundërshtuar 4 herë, megjithëse e kishte firmosur Edi Rama.
Dumani mbylli dosjen Alabar, dhe shqiptarët do e marrin vesh mirë se çfarë krimi në përmasa gjigante po kryhet me portin e Durrësit, çfarë goditje të rëndë po i jepet çdo shqiptari me portin e Durrësit, për aq sa ka peshë transporti i mallrave në çmimin e tyre. Pa llogaritur vjedhjet e tmerrshme që po bëhen.
Dumani mbylli dosjen e Olsi Ramës, e nxori tjetër.
Pra, Edi Rama duket se duhet me çdo kusht të kishte atë me të cilin ishte marrë vesh. Por u garantoj se nuk ka asnjë vështirësi të realizojë skenarin që realizoi me të parin. Nuk duhet të kemi iluzion.
Pra, përpjekja ndërkombëtare ishte shumë e drejtë, që qeveria të mos kapë kryetarin e Prokurorisë Speciale.
Por problemi nuk është aty, problemi është se pse Edi Rama do ta kapë me çdo kusht atë. Ne jemi para një realiteti shumë të zymtë. Një realitet në të cilin vjedhja e shqiptarëve nuk ka më frena. Është licencë.
Se kjo që bëri me pezullimin e pezullimit, gjykata mori përsipër Apelin dhe Gjykatën e Lartë dhe të pezullojë masën e sigurisë.
Imagjinoni ju tani se çfarë i mbetet themelit. Nuk ka akt më të rëndë ndaj taksapaguesve shqiptarë se sa ky. Nuk ka veprim më dëshpërues se ky. Nuk ka veprim më poshtërues se ky nga Edi Rama. Ndaj dhe kemi vetëm një rrugë, dhe kjo është rruga e protestave. Kjo është rruga e protestës, rruga e protestës.
Duhet të flasin qytetarët me protestën e tyre.
Sa janë ata që duan ët flasin me protestën e tyre? 1 mijë? Ne në krye. 2 mijë? Ne në krye. 300? Ne aty.
Por rrugë tjetër nuk ka. Të gjitha rrugët e tjera janë rrugë zjarrfikësish. Duhet t’i shohim gjërat siç është.
Ne nuk bëhemi kurrë zjarrfikës.”

Në fund, Kryetari i Partisë Demokratike paralajmëroi para Kryesisë së PD-së, Protestë Kombëtare më 22 dhjetor si dhe protesta gjer në krijimin e qeverisë teknike.

“Por ne kemi një problem themelor për të zgjidhur. Kemi një problem për të cilin duhet të jemi shumë të sinqertë dhe të hapur. Ekzistencës ose mosekzistencës sonë.
Pse kështu?
Në një farsë elektorale, më e shëmtuara në histori, në një diktaturë autoritare, e cila arrestoi në vit elektoral drejtuesit e partive kryesore opozitare.
Në një regjim që përdori të gjitha potencialet e shtetit, vetëm gjoba dhe kamata 2 miliardë euro, që u intereson 200 mijë familjeve, nga të cilat 84 mijë biznese aktive.
Dhe në këto kushte, shqiptarët përsëri votuan 500 e sa mijë për opozitën. Votuan PD-në si parti të parë.
PD është para një alternative, do vazhdojë të mbetet opozitë e farsave elektorale apo do përcaktojë qëllim të saj rrëzimin e këtij armiku të egër të votës së shqiptarëve, rikthimin e tyre, qeverinë teknike dhe marrjen e vlerësimit të qytetarëve të lirë.
Në një vend ku parlamenti kontrollohet në çdo sekondë, çdo minutë dhe çdo qelizë nga narkodiktatori.
Në një vend ku parlamenti me qëllim shndërrohet në institucionin më të diskredituar të vendit. Sepse është i vetmi institucion pluralist deri tani, ndaj dhe duhet të damkoset në mënyrën më të fuqishme në çdo gjë.
Në një vend ku mediat janë shndërruar në altoparlantë të pushtetit kundër opozitës dhe mbulimit të krimeve të pushtetit dhe damkosjes së opozitës.
Në një vend ku lobingjet zëvndësojnë standardet. Zëvendësojnë kriteret. Paratë e taksapaguesve përdoren për deklarata të blera. Çfarë do bëjmë ne? Çdo njëri nga ju duhet t’i shndërrojë këtë pyetje vetes. Pra, çfarë do bëjmë ne?
A do bëjmë ne përpjekjet për të rikthyer votën, për të larguar këtë qeveri nga pushteti, e cila me votë absolutisht nuk largohet? Ka një mburojë të tmerrshme lobingu ndërkombëtar që paguan dhjetëra milionë…
Prestigjiozja britanike dje shkruante se është i zemëruar, lexo lobingun e Edi Ramës. Nuk thoshte një fjalë se skandali përfshinte direkt atë.
Ka bërë dhjetëra artikuj ‘Economist’ për drogën dhe narkoshtetin e tij, në atë artikull asnjë fjalë, as për drogën, as për narkoshtetin. Po, e falënderoj, përmendte zgjedhjet. Për zgjedhje kishte një gjysëm rreshti.
Çfarë është ajo? Është lobing.
Marta Kos vjen dhe deklaron këtu se zgjedhjet ishin të lira. Falënderoj shumë Komisionin që reagoi, falenderoje dhe përfaqësuesin e BE këtu që reagoi. Por nuk ka spontanitet aty. Ato janë deklarata të paguara. Por, të gjitha këto, çfarë kërkojnë nga ne?
Kërkojnë ne që të mos filozofojmë, por të përqendrojmë të gjitha forcat tona për të larguar nga pushteti këtë pushtet krimi, përndryshe zgjedhjet e tjera do i kishte 63 përqind minimumi. Ose sa të dojë.
Ndaj dhe duhet të fillojmë protestat. Duhet t’i besojmë protestës. Duhet të organizojmë protestat, duhet t’i fillojmë sa më parë. I kemi filluar ato që janë te kryeministria,” tha Kryetari i Partisë Demokratike, Sali Berisha, duke përfunduar:
“Me datën 22, duhet të thërrasim protestë kombëtare. Ata shqiptarë që vijnë, ata janë të bekuar.
Ata që nuk do vijnë, do vijnë më vonë.
Por ne kurrë nuk do bëhemi pengesë, përkundrazi nxitës të protestave gjer ditën e fundit që të krijohet qeveria teknike në këtë vend për zgjedhjet e lira.
Agjendë tjetër nuk ka dhe nuk mund të ketë PD.”